အိမ်တွင်း အလှဆင် နည်းလမ်းများ

Home Office ဖန်တီးခြင်း

တည်းဖြတ်သူ Myanmar Home and Decoration
ရေးသားသူ Home & Deco အဖွဲ့သားများ မှ
October 14, 2020 နေ့
အိမ်တွင်း အလှဆင် နည်းလမ်းများ ကဏ္ဍတွင်
ထည့်သွင်းရေးသားခဲ့သည်။

ads


ကိုဗစ်နဲ့အတူ ယှဉ်တွဲကာနေထိုင်နေချိန်မှာတော့ အလုပ်ကို အိမ်မှာလုပ်ရတာလည်း ယဉ်ကျေးမှုတစ်ခုဖြစ်လာပါတယ်။ အလုပ်လုပ်တဲ့အခါမှာ လုပ်ဆောင်ရမယ့်အလုပ်တွေ ပြီးစီးအောင်လုပ်နိုင်ဖို့ လိုပါသေးတယ်။ Myanmar Home & Décor Magazine ရဲ့ ပရိတ်သတ်ကြီးမှာ အိမ်ကနေ အလုပ်လုပ်နေတဲ့သူတွေရှိမယ်ဆိုတာ သေချာတာမို့ ဖော်ပြပေးလိုက်ပါတယ်နော် …

တိုးတက်ပြောင်းလဲလာသော ခေတ်နှင့်အညီ အမျိုးသားတွေရော အမျိုးသမီးတွေပါ လုပ်ငန်းအမျိုးမျိုးကို လုပ်ကိုင်လာကြပါတယ်။ တချို့အိမ်မူကိစ္စတွေရော မိမိကိုယ်ပိုင်စီးပွားရေးရော တွဲဖက်လုပ်ကိုင်နေတဲ့ အမျိုးသမီးတွေအနေနဲ့ မိမိအိမ်မှာပဲရုံးထိုင်မယ်ဆိုရင် ပင်ပန်းနွမ်းနယ်မူကို သက်သာစေနိုင်တဲ့အပြင် အချိန်မီရုံးသွားရဖို့ ပြင်ဆင်ရတဲ့ စိတ်ဖိစီးမူကနေ ကင်းဝေးစေနိုင်ပါတယ်။ လုပ်ငန်းကြီးလုပ်သူများအတွက်ကတော့ အလုပ်ကပြန်လာပေမယ့်လည်း အိမ်ရောက်သည့်တိုင် အလုပ်ကိစ္စများ ပါလာတက်တာမို့ အိမ်မှာအလုပ်စားပ ွဲ(သို့) စာကြည့်ခန်း အသွင်ဆောင်တဲ့ နေရာလေးမှာ အလုပ်လုပ်ကြရပြန်တယ်။
ဒါပေမယ့် မိမိအိမ်မှာပဲရုံးခန်းတစ်ခုဖွဲ့စည်းမယ်ဆိုရင် သင့်တင့်တဲ့နေရာတခုတော့လိုအပ်ပါတယ်။ အပြင်မှာ ရုံးထိုင်ရတဲ့ မိရိုးဖလာထုံးစံတစ်ခုကနေခွဲထွက်ပြီး အောက်ပါအချက်များနဲ့ မိမိအိမ်မှာ ဖန်တီးကြည့်ရအောင်။

မိမိရဲ့ ရုံးခန်းမှာမရှိမဖြစ်လိုအပ်တဲ့ အသုံးအဆောင်များ ရွေးချယ်ထည့်ခြင်း
မိမိမှာ ရုံးခန်းလုပ်မတနေရာ ရပြီဆိုရင် ထိုနေရာမှာထားမဲ့ မရှိမဖြစ်လိုအပ်တဲ့အရာတွေကို အရင်ဆုံး စာရင်းလုပ်ပါ။ မပါမဖြစ်တဲ့အသုံးအဆောင်များကတော့ ဥပမာအားဖြင့်ဆိုရရင် စားပွဲ၊ ထိုင်ခုံ၊ ကွန်ပျူတာ၊ ဖုန်းတွေပေါ့။ မိမိလုပ်ကိုင်တဲ့လုပ်ငန်းပေါ်မူတည်ပြီး ကွန်ပျူတာစားပွဲကို ရွေးချယ်နိုင်ပါတယ်။ ပြီးတော့လုပ်ငန်းသုံးပစ္စည်းတွေ ထားနိုင်မဲ့နေရာလေးတစ်ခုလည်း လိုအပ်ပါသေးတယ်။ ဥပမာ ဖိုင် တွဲတွေထားတဲ့ နေရာလေးပေါ့။ အကယ်၍ သင်ဟာ ၀န်ဆောင်မူဆိုင်ရာလုပ်ငန်းတစ်ခုလုပ်သူဆိုလျှင် ဧည့်သည်နဲ့လက်ခံစကားပြောဖို့ သပ်ရပ်တဲ့နေရာလေးတစ်ခုကိုတော့ ဖန်တီးပေးထားသင့်ပါတယ်။

နေရာရွေးချယ်ခြင်း
ဒုတိယအဆင့်အနေနဲ့ကတော့ နေရာရွေးချယ်ဖို့ပါပဲ။ အကယ်၍ နေရာကကျဉ်းမြောင်းပြီး ထောင့်ချိုး(သို့) လှေကားချောင်လိုနေရာမျိုးရှိတယ်ဆိုရင်တော့ အဲဒီနေရာလေးတွေကိုအမှီပြုပြီး ဖိုင်တွဲများနဲ့ အခြားသောစာရွက်စာတမ်းများကိုသိုမှီဖို့ ဗီဒိုငယ်လေးများ(သို့) စင်လေးတွေဖန်တီးထားသင့်ပါတယ်။ သင့်အိမ်မှာ ရုံးခန်းတစ်ခုလုပ်မယ်ဆိုရင် အကောင်းဆုံးနေရာကတော့ သီးသန့်စာကြည့်ခန်းလိုနေရာက အကောင်းဆုံးပဲဖြစ်ပါတယ်။ ရုံးခန်းတစ်ခုဆိုတာ တိတ်ဆိတ်ငြိမ်သက်ပြီး အပြင်ကဆူညံသံတွေ ၀င်မလာနိုင်တဲ့အခန်းမျိုး၊ သပ်ရပ်သန့်ရှင်းပြီး လုံခြုံမှုရှိတဲ့ အခန်းမျိုးဖြစ်ဖို့ လိုအပ်ပါတယ်။ အဲဒီလိုအခန်းမျိုးမရနိုင်ဘူးဆိုရင်တော့ မိမိအိမ်ရဲ့ဝင်ပေါက်နဲ့ နီးတဲ့နေရာမှာ အလုပ်ခန်းလေးကို ထားရှိသင့်ပါတယ်။

ဖွဲ့စည်းတည်ဆောက်ပုံ
မိမိအိမ်မှာ ရုံးခန်းတစ်ခုလုပ်တော့မယ်ဆိုရင် အိမ်မှာ မိသားစုဝင်တွေလည်းရှိနေတဲ့အတွက် သီးသန့်ဧရိယာတစ်ခုအနေနဲ့ သတ်မှတ်ထားဖို့လိုပါလိမ့်မယ်။ မိမိရဲ့အသုံးအဆောင်ပစ္စည်းတွေကလည်း မိမိလုပ်ကိုင်မယ့်အလုပ်အတွက် လိုက်လျောညီထွေရှိပြီး မိမိအလုပ်လုပ်ကိုင်ရာမှာ လွယ်ကူချောမွေ့ဖို့အတွက် အထောက်အကူ ဖြစ်နေဖို့လိုပါတယ်။ ဖိုင်၊ စာရွက်စာတမ်း၊ မှတ်စုတွေထားဖို့အတွက် စာအုပ်စင်ငယ် (သို့) ဗီရိုငယ်လေးတွေ သုံးသင့်ပါတယ်။ မိမိအတွက်အရေးကြီးတဲ့ စာရွက်စာတမ်းတွေနဲ့ ပုံမှန်အသုံးပြုနေတဲ့ လုပ်ငန်းသုံးပစ္စည်းတွေကိုတော့ ကိုယ့်ရဲ့ အနီးအနား ဒါမှမဟုတ် အလုပ်စားပွဲမှာထားသင့်ပါတယ်။

ထားရှိသင့်တဲ့ မီးအလင်းရောင်
ဖြစ်နိုင်ရင်တော့ သဘာဝအလင်းရောင် ကောင်းကောင်းရတဲ့ နေရာမှာ ရုံးခန်းကိုဖွဲ့စည်းသင့်ပါတယ်။ မဖြစ်နိုင်ရင်တော့ သင့်တော်တဲ့လျှပ်စစ်မီးရောင်ရဖို့ လုပ်ဆောင်သင့်ပါတယ်။ မျက်နှာကျက်မှ မီးချောင်းများ တပ်ဆင်ထားမှုက ရုံးခန်းဧရိယာတစ်ခုလုံးကို လွှမ်းခြုံပြီး အလင်းရောင်ပေးနိုင်မယ် ့အနေအထားမှာ ရှိရပါမယ်။ ဒါပေမယ့် သင်ဟာ မျက်စေ့အားနည်းသူတစ်ယောက် ဆိုရင်တော့ သင့်ရဲ့အလုပ်စားပွဲမှာ စာကြည့်မီးအိမ်ကလေးတစ်ခုကိုပါ ထည့်သွင်းစီစဉ်ပါ။

ရုံးခန်းရဲ့ သင့်တော်မယ့် ရုံးအသုံးအဆောင်များပစ္စည်းများကို ရွေးချယ်ရန်
လိုအပ်တဲ့ပစ္စည်းမျိုးဖြစ်မယ်ဆိုရင် အလုပ်အတွက်ရင်းနှီးမြုပ်နှံဖို့အတွက် နှမြောနေဖို့ မသင့်တော်ပါဘူး။ ဥပမာ- မိမိလုပ်ငန်းအတွက် လိုက်လျောညီထွေရှိတဲ့ စားပွဲ၊ အရေးကြီးစာရွက်စာတမ်း တွေဖို့ ဗီဒိုငယ်များ၊ သက်တောင့်သက်သာရှိမယ့် နောက်မှီပါသော ထိုင်ခုံ၊ မိမိအလုပ်အတွက် အကောင်းဆုံး လုပ်ဆောင်မှုများကို ပေးစွမ်းနိုင်မယ့် ကွန်ပျူတာ၊ ယင်းကွန်ပျူတာနဲ့ တွဲဖက်အသုံးပြုမယ့် Printer ၊ မြန်နှုန်းမြင့် အင်တာနက်လိုင်း၊ မိမိအလုပ်မှာ အသုံးပြုမယ့် software တွေကို ၀ယ်ယူဖို့မနှမြောပါနဲ့။ လုပ်ငန်းကို တွင်ကျယ်စွာလုပ်နိုင်ဖို့က အရေးကြီးတဲ့အပြင် မိမိရဲ့ ကျန်းမာရေးကိုလည်း မထိခိုက်ဖို့ သတိပြုရမှာဖြစ်ပါတယ်။

ပြက္ခဒိန် နှင့် မှတ်စုစာအုပ်ထားရှိပါ။
သင့်ရုံးခန်းရဲ့ မြင်သာတဲ့နေရာမှာ ပြက္ခဒိန်တစ်ခုထားရှိပါ။ အလုပ်အတွက် ချိန်းဆိုမှုတွေရှိလာတဲ့ အခါမျိုးမှာမှတ်ဖို့အတွက် နေ့စဉ်ဒိုင်ယာရီမှတ်စုစာအုပ်လေးတစ်ခုလည်းလိုအပ်ပါတယ်။ ပြီးတော့ တစ်နေ့တာ နေ့စဉ်ပြုလုပ်ရမယ့်အချိန်ဇယားကိုလဲ သေချာစွာမှတ်သားထားဖို့လိုပါတယ်။ အလုပ်စားပွဲပေးမှာ အစိမ်းရောင်သစ်ပင်ငယ်လေးတစ်ခု (သို့) ပန်းအိုးငယ်လေးတစ်ခုကို ထားရှိပါတယ်။ အနီးအနားမှာ အမွှေးနံ့သာခဲလေးတစ်ခုကိုထားရှိပါ။ အလုပ်လုပ်ရာမှာ စိတ်ကြည်လင်ဆန်းနေမှာဖြစ်ပါတယ်။
ဒါဆိုရင်တော့ သင့်ရဲ့ Home Office လေးအတွက် ပြည့်စုံလုံလောက်နေပါပြီ။

ယခုဆောင်းပါးကို Myanmar Home & Décor Magazine ရဲ့ စာဖတ်ပရိတ်သတ်များအတွက် ပရိဘောဂများကို ကိုယ်ပိုင်စက်ရုံဖြင့် သင့်စိတ်တိုင်းကျထုတ်လုပ်ပေးနိုင်တဲ့ Fortune Era Design & Furniture Co., Ltd မှ ပံ့ပိုးပေးထားတာဖြစ်ပါတယ်။

Download eBook version as a FREE!

လူဖတ်အများဆုံး ဆောင်ပါး (၅)ပုဒ်

  • ခေါင်မိုးထပ်က ဥယျာဉ်လေး viewed
  • အလှမွေးငါးကန်ဖြင့် လာဘ်ခေါ်ခြင်း viewed
  • အိမ်ပြောင်းတဲ့အခါ လွယ်ကူစေမယ့်အချက်များ viewed

ads

နေအိမ်ကိုပြုပြင်မွမ်းမံရာမှာ လှေကားထစ်တွေက အရေးကြီးတဲ့အပိုင်းကပါဝင်ပါတယ်။ အထူးသဖြင့်အထပ်များတဲ့အိမ်တွေမှာ လှေကားတွေက စဉ်းစားစရာတစ်ခုပါ။ လှေကားထစ်တွေကို ပြန်ဆောက်ဖို့ဒါမှမဟုတ် အချောကိုင်ဖို့ပိုက်ဆံရှိသည်ဖြစ်စေ၊ မရှိသည်ဖြစ်စေ လှေကားတွေဆိုတာ လျစ်လျူရှုမထားသင့်တဲ့နေရာတွေပါ။ လှေကားတွေကိုအလှဆင်နိုင်မယ့်စိတ်ကူးလေးတွေကို ဖော်ပြပေး ချင်ပါတယ်။
၁။ အစားမထိုးပါနဲ့။ ပြန်အချောကိုင်ပါ။
လှေကားအဟောင်းကိုအလှဆင်ဖို့ ငွေကြေးအကုန်အကျအသက်သာဆုံးနည်းလမ်းက ပြန်အချောကိုင်ဖို့ပါ။ လှေကားထစ်တွေရဲ့ဒေါင်လိုက်အပိုင်းတွေကို အရောင်တစ်မျိုးတည်းလိုက်သုတ်ပြီး အလျားလိုက် အပိုင်းတွေကို ပြန်အချောကိုင်ခြင်းဖြင့်လှေကားကို အသွင်ပြောင်းလဲပစ်လို့ရပါတယ်။ လက်ရန်းတိုင်တွေကို ဆေးသုတ်ပြီး လက်ရန်းတွေကို ပြန်အချောကိုင်ဖို့မမေ့ပါနဲ့။ ပိုပြီးသမားရိုးကျ ပုံစံမျိုးဖြစ်နေပေမယ့် စတိုင်လ်ကျတဲ့ ကော်ဇောတစ်ခုခင်းပြီး ခေတ်မီတဲ့ အပြင်အဆင်ဖြစ်အောင် အလွယ်တူဖန်တီးလို့ရပါတယ်။


၂။ ချွေတာခြင်း
အသစ်ဖြစ်ဖြစ်၊ အဟောင်းဖြစ်ဖြစ် လှေကားကိုအလှဆင်ဖို့ကုန်ကျစရိတ်အသက်သာဆုံးနည်းလမ်းက ဒေါင်လိုက်မျက်နှာပြင်၊ အလျားလိုက်မျက်နှာပြင်နဲ့ လက်ရန်းတွေအပါအဝင် မျက်နှာပြင်အားလုံးကို ဆေးသုတ် လိုက်ဖို့ပါပဲ။ ပုံမှာပြထားတဲ့အတိုင်း အဖြူနဲ့ အမည်းလိုဆန့်ကျင်ဘက်အရောင်တွေသုတ်ရင် တစ်မျိုး တစ်ဖုံ လှပစေပါတယ်။
၃။ အပေါ်တစ်ထပ်လိုက်ခြင်း
နောက်ထပ်ကုန်ကျစရိတ်သက်သာစေတဲ့နည်းလမ်းတစ်ခုက လှေကားထစ်ရဲ့ဒေါင်လိုက်နဲ့ အလျား လိုက်အပိုင်းတွေကို အပေါ်ယံ တစ်လွှာထပ်လိုက်ပေးဖို့ပါပဲ။ လှေကားကို ဖြိုချဖို့၊ပြန်ဆောက်ဖို့ အကုန်အကျ ခံစရာမလိုဘဲ ရှိနေတဲ့လှေကားထစ်တွေပေါ်မှာပဲ တစ်လွှာ ထပ်အုပ်လို့ရပါတယ်။ ဒါကလည်း ရိုးရှင်းတဲ့ပုံစံကနေ ခေတ်မီတဲ့ပုံစံကို ပြောင်းလဲပစ်နိုင်မယ့်အခွင့်အရေးတစ်ခုပါ။


၄။ ပစ္စည်းပြဿနာ
ရိုးရိုးလှေကားဖြစ်ဖြစ်၊ ခေတ်မီလှေကားဖြစ်ဖြစ် အလှဆင်ဖို့နောက်ထပ်နည်းလမ်းတစ်ခုကတော့ လက်ရန်းတိုင်တွေ အတွက် အသုံးပြုထားတဲ့ပစ္စည်းတွေကို ပြောင်းလဲပစ်ခြင်းပါပဲ။ လက်ရန်းမှာ သံ သို့မဟုတ် သံမဏိ ပေါင်းထည့်ခြင်းက လှေကားပုံစံတစ်ခုလုံးကို ပြောင်းလဲသွားစေနိုင်ပါတယ်။
၅။ မှန်ထည့်ခြင်း
မှန်လက်ရန်းတွေကို လူတိုင်းကြိုက်နှစ်သက်ကြပေမယ့် လှေကားက ဘယ်ကိုဦးတည်နေလဲဆိုတာ ထည့်စဉ်းစားရပါမယ်။ အရင်ဆုံးမှန်လက်ရန်းမှာ လက်ဗွေရာတွေထင်တော့မှာဖြစ်တဲ့အတွက် သန့်ရှင်း သပ်ရပ်မှု ကိုနှစ်သက်သူဆိုရင် မှန်ကိုပုံမှန်သန့်ရှင်းရေး လုပ်ပေးဖို့လိုလာပါပြီ။ နောက်ပြီး မှန်လက်ရန်းရှိရုံနဲ့တင် မလုံလောက်ပါဘူး။ မှန်လက်ရန်းအပေါ်မှာ လက်ရန်းတစ်ခုထပ်ဖို့လိုအပ်ပါသေးတယ်။ ဒါကြောင့် ဘယ်လိုပုံစံလိုချင်တယ် ဆိုတဲ့အချက်အလက်တွေကို သေချာစဉ်းစားပါ။


၆။ အလျားလိုက်လက်ရန်း
ခေတ်ပေါ်လှေကားတွေအတွက် လူကြိုက်များတဲ့ပုံစံပါ။ ဒါပေမယ့်တချို့ဒေသတွေမှာ ဒီလိုလက်ရန်းမျိုးက ဆောက်လုပ်ရေး စည်းမျဉ်းတွေကိုဖောက်ဖျက်ရာရောက်တယ်လို့ ယူဆကြပါတယ်။ ဒီလှေကားလက်ရန်းကို ရွေးချယ်လိုက်ပြီဆိုရင် ကလေးတွေ တွယ်တက်နိုင်တာကြောင့် အန္တရာယ်ရှိနိုင်ပါတယ်။ ကလေး ငယ်ငယ်လေးတွေရှိရင် တခြားတစ်ခုကိုပဲရွေးချယ်ပါ။
၇။ ပိုမိုစိတ်ချရသောအလျားလိုက်လက်ရန်း
အလျားလိုက်လက်ရန်းက အန္တရာယ်ရှိတယ်ဆိုပေမယ့်ကြမ်းပြင်ကနေ မျက်နှာကြက်အထိ လက်ရန်း ဘေးမှာ သစ်သားချောင်း တွေနဲ့အပိတ်ကာရံလိုက်မယ်ဆိုရင် ဘယ်သူမှတွယ်တက်နိုင်တော့မှာမဟုတ်ပါဘူး။ ဘေးကပ်လျက်အခန်းအတွက်လည်း လှပတဲ့နောက် ခံတစ်ခုကို ဖန်တီးပေးနိုင်ပါလိမ့်မယ်။


၈။ ဒေါင်လိုက်အပိုင်းတွေကို အပွင့်ထားပါ
ဒီပုံစံက ငွေကြေးအကုန်အကျများပါတယ်။ အပွင့်ပုံစံလွင့်မျောနေတဲ့ဟန်နဲ့ လှေကားထစ်တွေမှာ ထောက်ပံ့ပေးဖို့သံမဏိကိုယ်ထည်ကောင်းကောင်းလိုအပ်ပါတယ်။ သံမဏိကဈေးကြီးပါတယ်။ လက်ဖက်ထောက် ကလေးငယ်လေးက ဧည့်ခန်းထဲမှာလျှောက်သွား နေတတ်တယ် ဆိုရင်အလျားလိုက် လှေကားနေရာ တစ်ခုချင်းစီကြားမှာ လေးလက်မထက်မကျော်ပါစေနဲ့။ ဒါဆို ကလေးကျွံမဝင်သွားနိုင် တော့ပါဘူး။

၉။ တီထွင်ဖန်တီးခြင်း
လှေကားလက်ရန်းတွေအတွက် စည်းမျဉ်းသတ်မှတ်ချက်တွေရှိတဲ့နေရာမှာနေထိုင်တယ်ဆိုရင် မူလလှေကားပုံစံရရှိဖို့ လိမ္မာပါးနပ်တဲ့နည်းတွေကို အသုံးပြုရပါမယ်။ ဒီနေရာမှာ ဒေါင်လိုက်လှေကားထစ်နေရာကို ကျဉ်းသွားစေဖို့ အလျားလိုက်လှေကားထစ်နေရာကို ထုထည်အရွယ်အစားကြီးမားအောင် လုပ်ဆောင် ထားပါတယ်။ ခပ်ကျဉ်းကျဉ်းနဲ့စိပ်တဲ့ပုံစံပေါက်အောင် လက်ရန်းတိုင်တွေကို သံမဏိအသုံးပြုထားပါတယ်။


၁၀။ စိတ်ကြိုက်ရွေးချယ်ပါ
သမားရိုးကျလက်ရန်းတစ်ခုကိုပဲ ဖက်တွယ်မထားရဘဲ ဆောက်လုပ်ရေးစည်းမျဉ်းတွေနဲ့လည်း ကိုက်ညီနိုင်တဲ့ နည်းလမ်းကောင်းတွေ ရှိပါတယ်။ စိတ်ကြိုက်ဒီဇိုင်းရွေးချယ်ထားတဲ့သံမဏိ သို့မဟုတ် သစ်သားလက်ရန်းတွေက ဘယ်လိုအိမ်မျိုးအတွက်မဆို စိတ်ဝင် စားဖွယ်ရာကောင်းအောင် ဖန်တီးပေးနိုင် ပါတယ်။
၁၁။ နံရံအပိတ်
လှေကားဘေးက ငြီးငွေ့စရာကောင်းတဲ့လက်ရန်းပုံစံနဲ့အဆောက်အအုံတွေအတွက် လက်ရန်းနံရံ အပိတ်ကိုအသုံးပြုခဲ့တဲ့အချိန်တွေလည်းရှိခဲ့ပါတယ်။ ဒီနေ့ခေတ်မှာဆိုရင် တခြားပစ္စည်းတွေနဲ့ရောနှောလို့မရတဲ့ ကြောင်လိမ်လှေကားတွေမှာ ဖဲပြားပုံစံတောင် ဖန်တီးလို့ရပါတယ်။


၁၂။ သိုလှောင်သိမ်းဆည်းခြင်း
ပစ္စည်းထည့်တဲ့နေရာက လက်ရန်းတွေ၊ လှေကားထစ်အလျားနေရာ၊ ဒေါင်လိုက်နေရာတွေနဲ့ မဆိုင်ပေမယ့်လှေကားထစ်တွေ အကြောင်းပြောရင် ထည့်မပြောရမနေနိုင်ပါဘူး။ လွင့်မျောနေတဲ့ပုံစံနဲ့ လှေကားဆိုရင်တောင် လှေကားဒီဇိုင်းနဲ့ ပတ်သက်လို့ တီထွင်ဆန်း သစ်မှုရှိတယ်ဆိုရင် လှေကားအောက်က ပစ္စည်းထည့်ဖို့နေရာရှိတယ်ဆိုတာမမေ့သင့်ပါဘူး။
၁၃။ ပျော်ရွှင်စရာလေးတွေလုပ်ပါ
စိတ်ဝင်စားစရာအကောင်းဆုံးလှေကားတွေက အနုပညာလက်ရာတွေပေါင်းစပ်ပါဝင်ဖွဲ့စည်း ထားတဲ့ လှေကားတွေပါ။ အတွန့်အလိမ်လှေကားဖြစ်ဖြစ်၊ စိတ်ကူးဉာဏ်ကွန့်မြူးထားတဲ့လှေကား ဒါမှမဟုတ် သမားရိုးကျလှေကားပဲဖြစ်ဖြစ် လှေကားကိုထူးထူးခြားခြား အလှဆင်ဖို့ ကြောက်ရွံ့မနေပါနဲ့။

Photo Credit – Internet

Download eBook version as a FREE!

လူဖတ်အများဆုံး ဆောင်ပါး (၅)ပုဒ်

  • ခေါင်မိုးထပ်က ဥယျာဉ်လေး viewed
  • အလှမွေးငါးကန်ဖြင့် လာဘ်ခေါ်ခြင်း viewed
  • အိမ်ပြောင်းတဲ့အခါ လွယ်ကူစေမယ့်အချက်များ viewed

ads

တစ်နေ့သ၌ ကျွနု်ပ်ထံသို့ ကျောင်းနေဖက်သူငယ်ချင်းများဖြစ်ကြသော မိုးကျော်၊ ဖိုးထော်နှင့် စိုးမော်ဆိုသူတို့ ရောက်ရှိလာကြလေသည်။ သူငယ်ချင်း သုံးဦးတွင် စိုးမော်မှာ မိန်းကလေးဖြစ်ပြီး အမည်ရင်းမှာ စိုးစိုးမော်ဟူ၍ ဖြစ်ပြီး မိုးကျော်၊ ဖိုးထော်တို့နှင့်တွဲကာ သူ့ကိုလည်း စိုးမော်ဟုသာ ခေါ်ခဲ့ကြ၏။
၎င်းတို့သုံးဦးသည် ကျွနု်ပ်တည့်ခင်းဧည့်ခံသော မနောမယလက်ဖက်ရည်ကို သောက်ကြလေ၏။ စိုးမော်က တစ်ဝက်သာသောက်ပြီး မိုးကျော်က နှစ်ခွက်ဆင့်၍ သောက်လေ၏။ စိုးမော်က –
‘ဒီလိုသူငယ်ချင်းရေ့ တစ်ချို့ ရုံးခန်းတွေ၊ အလုပ်ခန်းတွေမှာ ပန်းချီကားကြီးတွေ ကျကျနန လှလှပပချိတ်ထားတာ ငါဖြင့် ရမ်းသဘောကျတာပဲ။ ငါတို့အလုပ်ခန်းတွေမှာလည်း အဲ့ဒီလို ပန်းချီကားကြီးတွေ ကျကျနနချိတ်ထားချင်တယ်ဟာ။ ငါတို့ သူငယ်ချင်း ဗေဒင်ဆရာကြီး တစ်ယောက်လုံးရှိနေတာဆိုတော့ ဒီအတိုင်း ရမ်းပြီးချိတ်မယ့်အစား သူငယ်ချင်းပြောတဲ့ ပန်းချီကားတွေချိတ်မယ်ဆိုပြီး သုံးယောက်သား တိုင်ပင်ပြီးလာခဲ့ကြတာဟေ့ …. ။’ ဟု ၎င်းတို့လာရင်း ကိစ္စကို ပြောပြကြလေ၏။ ကျွနု်ပ်လည်း စီးကရက်ကို နှစ်ဖွာခန့်မျှဆက်၍ ဖွာလိုက်ပြီးသည့်နောက် –


‘ဇမ္မူဒီပါ လက်ယာတောင်ကျွန်းမှာ သြဘာနိမိတ်ထွန်းသတဲ့ ။ တစ်ချို့လည်း ဓာတ်ဘိသိတ်ပန်းချီဆိုပြီး တကူးတက ပန်းချီဆရာဆီမှာအပ်ပြီး ဓာတ်ပန်းချီကားတွေ ဆွဲခိုင်းလေ့ရှိတယ် ။ နင်တို့အနေနဲ့ ရှိပြီးသားပုံတွေ ဝယ်လို့ ကူးလို့လွယ်မယ့် ပုံတွေကို ချိတ်ချင်သပ ဆိုရင်လည်း ချိတ်ကြပေါ့ ’ ဟု ပြောလိုက်ရာ ဖိုးထော်က –
‘ အေး၊ အဲ့ဒီလိုပဲ လုပ်စမ်းပါကွာ ။ ငါတို့ကလည်း အချိန် သိပ်ပေးနိုင်တာမဟုတ်ဖူးကွ’ ဟု ပြောရင်း လက်ကျန်လက်ဖက်ရည်ခွက်ကို တစ်ကျိုက်တည်း မော့ချလိုက်လေ၏။ မိုးကျော်ကလည်း –


‘အေးပါကွာ လွယ်လယ်ကူကူသာ လုပ်ပါ သူငယ်ချင်းရယ် ။ ခေတ်က ပြောင်းသွားပြီကွ ။ ဟိုးရှေးတုန်းကဆိုရင် ကုန်ပစ္စည်းကြော်ညာမှာတာတောင် မဂ္ဂဇင်းတစ်မျက်နှာလောက် စာတွေ စီကာပတ်ကုန်း အရှည်ကြီးကြော်ညာကြတာ ။ ဒီခေတ်မှာတော့ လိုရင်းတိုရှင်း ထိထိမိမိပဲ ကြော်ညာကြတော့တယ်ဟေ့ ။ အဲ့ဒီတော့ ဆရာသမားရဲ့ ပန်းချီကိုလည်း အကျယ်ချဲ့တဲ့ နည်းတွေနဲ့တော့ လာမပြောပါနဲ့ကွာ ’ ဟု ဝင်၍ ထောက်ခံလေ၏။ ထို့ကြောင့် ကျွနု်ပ်လည်း ပြုံး၍ –
‘အေးပါကွာ ။ ဘာပဲဖြစ်ဖြစ် တစ်ခုသတိထားဖို့ကတော့ အလုပ်ခန်းတွေ၊ ရုံးခန်းတွေမှာ မကောင်းတဲ့သဘောသက်ရောက်တဲ့ အနိဋ္ဌသဘောဆောင်တဲ့ ပုံမျိုးတွေတော့ မချိတ်အပ်ဘူးကွ’ ဟု ပြောလိုက်လျှင် စိုးမော်က –
‘အေးပါဟယ် ။ ငါတို့အနေနဲ့ ဘယ်လိုပုံတွေ ချိတ်ရမလဲဆိုတာသာပြောပါတော့’ ဟု လောဆော်လေတော့၏။ ထို့ကြောင့် ကျွနု်ပ်က –


‘ကဲ …..ကဲ ….. အဲ့ဒါဆိုလည်း မှတ်စုနဲ့သာ မှတ်ပြီး ယူသွားကြပေတော့။ တော်ကြာ မောင်လေးအတွက်၊ ကြီးတော်အတွက်၊ အဖေ့အတွက်ဆိုပြီး မေးနေကြဦးမယ် …..’ ဟု ပြောပြောဆိုဆိုပင် မိမိတို့၏ မွေးနေ့အလိုက်အောင်မြင်ခြင်း၊ လာဘ်ရွှင်ခြင်း၊ လူချစ်လူခင်ပေါများခြင်း စသောကောင်းကျိုးချမ်းသာများ ရရှိစေနိုင်မည့် ပန်းချီပုံများကို အောက်ပါအတိုင်းပြောပြလိုက်ရပါတော့လေသတည်း ….။
တနင်္ဂနွေသားသမီးများ – သိကြားမင်းပုံ၊ သစ်ပင်ကြီးကြီးမားမား လှလှပပပုံ၊ သမင်ပုံ၊ ကျားပုံ။
တနလာၤသားသမီးများ – နတ်သား၊ နတ်သမီးပုံ၊ နေထွက်စ ရှုခင်းပန်းချီကားပုံ၊ ထန်းပင်၊ ထန်းတောပုံ၊ ဆင်ပုံ။
အင်္ဂါသားသမီးများ – အုန်းပင်၊ အုန်းတောပုံ၊ ရွှေအိုးပုံ၊ ရေအိုးပုံ၊ လှေပုံ၊ လှည်းပုံ။
ဗုဒ္ဓဟူးသားသမီးများ – ကြေးအိုးလှလှပုံ၊ ငွေအိုးလှလှပုံ၊ ပန်းအိုးလှလှပုံ၊ ကမ္ဘာ့မြေပုံ၊ ကျားပုံ၊ မြင်းပုံ။
ကြာသပတေးသားသမီးများ- စစ်သူကြီးမဟာဗန္ဓုလပုံ၊ ဆိပ်ကမ်းရှုမျှော်ခင်းပုံ၊ စကြာတံဆိပ်ပုံ၊ စောင်းပုံ၊ ဆင်ပုံ။
သောကြာသားသမီးများ – လှေပုံ၊ လှည်းပုံ၊ ဇင်ယော်ပုံ၊ ဆိုင်းဝိုင်းပုံ၊ ဆင်ပုံ။
စနေသားသမီးများ – ဘုရားစေတီပုံတော်၊ ပန်းအိုးလှလှပုံ၊ မြင်းပုံ၊ လှေပုံ၊ မီးအိမ်ပုံ။

Photo Credit – Internet

Download eBook version as a FREE!

လူဖတ်အများဆုံး ဆောင်ပါး (၅)ပုဒ်

  • ခေါင်မိုးထပ်က ဥယျာဉ်လေး viewed
  • အလှမွေးငါးကန်ဖြင့် လာဘ်ခေါ်ခြင်း viewed
  • အိမ်ပြောင်းတဲ့အခါ လွယ်ကူစေမယ့်အချက်များ viewed