အခြားဆောင်းပါးများ

သမိုင်းထဲက အတွင်းဝန်ရုံး

တည်းဖြတ်သူ Myanmar Home and Decoration
ရေးသားသူ Home & Deco အဖွဲ့သားများ မှ
July 19, 2020 နေ့
ဆောင်းပါးများအခြားဆောင်းပါးများ ကဏ္ဍတွင်
ထည့်သွင်းရေးသားခဲ့သည်။

ads

အာဇာနည်နေ့ဆိုတာ မြန်မာနိုင်ငံရဲ့ သမိုင်းမှာ ဘယ်တော့မှဖျောက်မရ၊ မေ့မရနိုင်တဲ့ နေ့ရက်တစ်ခုဆိုတာ မြေကြီးလက်ခတ်မလွဲပါ။ အတိတ်ကိုပြန်ပြောင်းသတိရရင်း ရေးရမယ်ဆိုရင် မြန်မာနိုင်ငံရဲ့ လွတ်လပ်ရေးဗိသုကာကြီးဖြစ်တဲ့ ဗိုလ်ချုပ်အောင်ဆန်းနှင့်အတူ အစိုးရအဖွဲ့ဝင်ဝန်ကြီး ၆ဦး၊ အတွင်းဝန်တစ်ဦး၊ ကိုယ်ရံတော်တစ်ဦးတို့သည် ၁၉၄၇ခုနှစ်၊ ဇူလိုင်လ ၁၉ရက်နေ့တွင် ရန်ကုန်မြို့ရှိ အတွင်းဝန်ရုံးတွင် အစည်းအဝေးကျင်းပနေစဉ် လုပ်ကြံခံခဲ့ရတာဖြစ်ပါတယ်။ နာမည်များဖြင့် ဖော်ပြရမယ်ဆိုရင်တော့ ထိုလုပ်ကြံခံခဲ့ရသူများမှာ ဗိုလ်ချုပ်အောင်ဆန်း၊ ဦးအုန်းမောင်၊ မိုင်းပွန်စော်ဘွားကြီးစဝ်စံထွန်း၊ ဦးဘဝင်း၊ သခင်မြ၊ ဒီးဒုတ်ဦးဘချို၊ မန်းဘခိုင်၊ ဦးရာဇာတ်နှင့် ရဲဘော်ကိုထွေးတို့ဟာ တချိန်တည်းမှာပဲ မြန်မာနိုင်ငံရဲ့လွတ်လပ်ရေးအတွက် အသက်စွန့်လှူခဲ့ရတာဖြစ်ပါတယ်။ ထို့နည်းတူစွာပဲ ဝန်ကြီးများရုံးအဆောက်အဦသည်လည်း သမိုင်းဝင်နေရာတစ်ခုဖြစ်လာခဲ့ပါတယ်။
ဝန်ကြီးများရုံးသည် ဗိုလ်ချုပ်အောင်ဆန်းနှင့် အာဇာနည်များခေါင်းဆောင်များ အသက်ပေးလှူခဲ့သည့်နေရာအဖြစ်သာ လူအများသိရှိထားခဲ့ပြီး မြန်မာ့သမိုင်းတွင် အရေးပါသည့် အခြားသော အကြောင်းအရာများလည်းရှိနေတာသေးတာကို သိစေလိုသည့်အတွက် ယခုဆောင်းပါးကို တင်ဆက်လိုက်ခြင်းဖြစ်ပါတယ်။


ဝန်ကြီးများရုံးရဲ့ သမိုင်းကြောင်းကို စတင်လေ့လာကြရအောင် ….. ဝန်ကြီးများရုံးကို ၁၈၈၉ ခုနှစ်မှာ ကိုလိုနီအစိုးရရဲ့ ရုံးလုပ်ငန်းများ လုပ်ဆောင်နိုင်ဖို့အတွက် ဗစ်တိုးရီးယန်းစတိုင် အဆောက်အအုံကြီးအဖြစ် စတင်တည်ဆောက်ခဲ့တာဖြစ်ပါတယ်။ ဝန်ကြီးများရုံးရဲ့ အဆောက်အအုံဒီဇိုင်းကို ရေးဆွဲခဲ့သူမှာ ဗိသုကာ အင်ဂျင်နီယာချုပ် Henry Hoyne-Fox ဖြစ်ပြီး တောင်ဘက်အဆောင် (ယခု မဟာဗန္ဓုလလမ်းနှင့် အပြိုင်) ကို ၁၈၉၃ မှာ တည်ဆောက်ပြီးစီးခဲ့ပါတယ်။ ၁၉၀၃ခုနှစ်မှာ အရှေ့ဘက်နှင့် အနောက်ဘက်အဆောက်အအုံကို ဆက်လက်တည်ဆောက်ခဲ့ပြီး ၁၉၀၅ခုနှစ်တွင် တည်ဆောက်ပြီးစီးခဲ့ပြီး ငွေကျပ် ၂၅သိန်းကျော်ကုန်ကျခဲ့ပါတယ်။ ထိုအချိန်ကစပြီး အတွင်းဝန်ရုံးလို့သာအမည်တွင်စေခဲ့ပြီး ကြီးမားလှတဲ့ ပရဝဏ်ကြီးဖြစ်တာမို့ အစိုးရရုံးစိုက်ရာဖြစ်ခဲ့ပြီး နိုင်ငံရေး၊ စစ်ရေး၊ ရဲအရေး၊ အခွန်၊ သစ်တောရေး၊ ဘဏ္ဍာရေးနှင့် တရားစီရင်ရေး၊ စည်ပင်သာယာရေး အစရှိတဲ့ အစိုးရရုံးဌာနတွေစိုက်ရာ ဗြိတိသျှကိုလိုနီအုပ်ချုပ်ရေးစနစ်တစ်ခုလုံးကို စီမံအုပ်ချုပ်ခဲ့ပါတယ်။ ထိုစဉ်အချိန်ကာလမှာတော့ အများပြည်သူ အပန်းဖြေနိုင်အောင် ညနေပိုင်း များမှာ ခြံဝင်းကိုဖွင့်လှစ်ပေးလေ့ရှိခဲ့ပါတယ်။
၁၉၂၃ ခုနှစ် ဒိုင်အာခီအုပ်ချုပ်ရေး၊ ၁၉၃၂ ခုနှစ် အိန္ဒိယမှ ခွဲထွက်ရေးအတွက် မြန်မာ့ဥပဒေပြုရေးကောင်စီရဲ့ရွေးကောက်ပွဲ၊ ၂၉၇၃ခုနှစ်မှာ အိန္ဒိယနိုင်ငံက ခွဲထွက်ပြီးနောက်ပိုင်း ၁၉၃၅ခုနှစ် မြန်မာနိုင်ငံအုပ်ချုပ်ရေးအက်ဥပဒေ အဖြစ် ပြောင်းလဲမှုများအားလုံးဟာ အတွင်းဝန်ရုံးကသာ စတင်ခဲ့တာဖြစ်ပါတယ်။ ရန်ကုန်တက္ကသိုလ်ကျောင်းသားများဟာ နိုင်ငံရေးမှာပါဝင်လာကြပြီး ကိုလိုနီအစိုးရကို မကြာခဏဆိုသလို ဆနပြကြပါတယ်။ အထင်ကရဖြစ်ခဲ့တာကတော့ ရန်ကုန်တက္ကသိုလ်ကျောင်းသားများက အထက်မြန်မာပြည်မှ ချီတက်လာတဲ့ အလုပ်သမားများနဲ့ပူးပေါင်းပြီး ဆန္ဒပြခဲ့တဲ့အတွက် ကိုလိုနီအစိုးရက ဆန္ဒပြကျောင်းသားခေါင်းဆောင်များကို ဖမ်းဆီးခဲ့ပါတယ်။ ထိုဖမ်းဆီးခံကျောင်းသားခေါင်းဆောင်များကို ပြန်လွှတ်ပေးဖို့ ဒီဇင်ဘာ ၂၀၊ ၁၉၃၈ မှာ တက္ကသိုလ်ကျောင်းသား၊ ကျောင်းသူများဟာ အတွင်းဝန်ရုံးကို ချီတက် ဆန္ဒ ပြခဲ့ပါတယ်။ ဆန္ဒ ပြကျောင်းသားများကို စစ်ပုလိပ်များက ဖြိုခွင်းခဲ့ပြီး ကျောင်းသားခေါင်းဆောင် ကိုအောင်ကျော်ဟာ အင်္ဂလိပ်ရဲတွေရဲ့ ရိုက်နှက်ခံရတဲ့ဒဏ်ကြောင့် ကျဆုံးခဲ့ရပါတယ်။ ထိုအကြောင်းအရာကို အစွဲပြုပြီး အတွင်းဝန်ရုံးရဲ့ အနောက်ဘက်မှာရှိတဲ့လမ်းကို ဗိုလ်အောင်ကျော်လမ်းလို့ ခေါ်တွင်ခဲ့ကြခြင်းဖြစ်ပါတယ်။


မြန်မာနိုင်ငံရဲ့ ပထမဆုံးလွှတ်တော်အဆောက်အအုံသည် အတွင်းဝန်ရုံးပရဝဏ်အတွင်းမှာတည်ရှိပြီး စနစ်တကျတည်ဆောက်ထားတာကို ယနေ့တိုင်မြင်တွေ့နိုင်မှာဖြစ်ပါတယ်။ ထိုအဆောက်အအုံငယ်အတွင်းမှာ ၁၉၄၇ခုနှစ် ၁၉၆၂ခုနှစ်အထိ လွှတ်တော်အစည်းအဝေးများကို ကျင်းပခဲ့တယ်လို့ သမိုင်းအထောက်အထားများအရ လေ့လာခွင့်ရရှိခဲ့ပါတယ်။ ၁၉၄၇ ခုနှစ် မြန်မာ့အထွေထွေရွေးကောက်ပွဲမှ ရွေးကောက်တင်မြှောက်ခံရတဲ့ ကိုယ်စားလှယ်တွေပါဝင်တဲ့ တိုင်းပြုပြည်ပြုလွှတ်တော် အစည်းအဝေးများကို ထိုအဆောက်အအုံမှာ ကျင်းပခဲ့တာဖြစ်ပြီး လွတ်လပ်ရေးအတွက်လည်း ဆွေးနွေးခဲ့တဲ့နေရာဖြစ်ပါတယ်။ ထိုအဆောက်အအုံမှာ ၁၉၄၇ခုနှစ်မှ ၁၉၅၁ ခုနှစ်အထိ တိုင်းပြုပြည်ပြုလွှတ်တော်အစည်းအဝေးကို ၁၅ကြိမ်တိုင်တိုင် ကျင်းပခဲ့ပါတယ်။ လွတ်လပ်ရေးရရှိပြီးတဲ့အခါမှာတော့ အဆိုပါလွှတ်တော်ကို လွှတ်တော်နှစ်ရပ်ပါဝင်တဲ့ ပြည်ထောင်စုမြန်မာနိုင်ငံလွှတ်တော်အနက် တစ်ရပ်ဖြစ်တဲ့ ပြည်သူ့လွှတ်တော်အဖြစ်အသုံးပြုခဲ့ပါတယ်။
၁၉၄၇ခုနှစ်၊ ဇူလိုင်လ ၁၉ရက်နေ့ မနက်ပိုင်းမှာ ဗဟိုအလုပ်အမှုဆောင်အစည်းအဝေးကျင်းပနေချိန် ဗိုလ်ချုပ်အောင်ဆန်းနှင့်တကွ အာဇာနည်ခေါင်းဆောင်ကြီးများ လုပ်ကြံခံရမှုဖြစ်ပွားခဲ့ပြီး တိုင်းပြည်အတွက် အစားထိုးလို့မရတဲ့ သမိုင်းဝင်ဆုံးရှုံးမှုကြီးဖြစ်ပေါ်ခဲ့ပါတယ်။ ဘုရင်ခံ ဆာဟူးဘတ်ရန့်ဦးဆောင်တဲ့ အစိုးရအဖွဲ့အလုပ်အမှုဆောင်အစည်းအဝေးကို ဘုရင်ခံအိမ်တော်မှာ ကျင်းပလေ့ရှိပေမယ့် ၁၉၄၇ ခုနှစ်အစောပိုင်းလောက်မှစကာ လွတ်လပ်သော မြန်မာနိုင်ငံ၏ ခရီးစဉ်အတွက် ဘုရင်ခံက အစည်းအဝေးများမှာ မပါဝင်တော့ဘဲ ဒုဥက္ကဌဖြစ်တဲ့ ဗိုလ်ချုပ်အောင်ဆန်းဦးဆောင်ကာ အတွင်းဝန်ရုံးရှိ ကောင်စီရုံးခန်းမှာပဲ ကျင်းပခဲ့တာဖြစ်ပါတယ်။
ဗိုလ်ချုပ်အသက်ပေးကာ ကြိုးပမ်းခဲ့သည့် မြန်မာ့လွတ်လပ်ရေးကို ၁၉၄၈ခုနှစ်၊ ဇန်နဝါရီလ (၄)ရက်နေ့မှာရရှိခဲ့ပြီး မနက် ၄နာရီ မိနစ်၂၀ အချိန်မှာ အတွင်းဝန်ရုံးရှိ လွှတ်တော်အဆောက်အအုံရှေ့တွင် ယူနီယံအလံကို ဖြုတ်ချပြီး မြန်မာနိုင်ငံတော်သီချင်းတီးမှုတ်ကာ မြန်မာနိုင်ငံတော်အလံကို လွှင့်တင်ခဲ့ကြတာဖြစ်ပါတယ်။ လွတ်လပ်ရေးရပြီးနောက်ပိုင်းမှာ မြန်မာနိုင်ငံအစိုးရသစ်၏ ဝန်ကြီးဌာနများနဲ့ အစိုးရရုံးဌာနများကို အတွင်းဝန်ရုံးမှာပဲ ဖွင့်လှစ်ခဲ့ပြီး ဝန်ကြီးများရုံးလို့ အမည်ပြောင်းလဲခေါ်ဆိုခဲ့ကြပါတယ်။


ဝန်ကြီးများရုံးကို ၂၀၁၄ခုနှစ်မှာ အများပြည်သူများအား ဝင်ရောက်လေ့လာခွင့်ရရှိခဲ့ပါတယ်။ ဝန်ကြီးများရုံးပရဝဏ်အတွင်းမှာရှိတဲ့ မြန်မာနိုင်ငံရဲ့ ပထမဆုံးလွှတ်တော်၊ လွှတ်လပ်ရေးနေ့အလံတင်အခမ်းအနား ကျင်းပရာနေရာ၊ ဗိုလ်ချုပ်အောင်ဆန်းနှင့် အာဇာနည်ခေါင်းဆောင်များ လုပ်ကြံခံခဲ့ရတဲ့ အစည်းအဝေခန်းမနှင့် ဝန်ကြီးများရဲ့ ရုံးခန်းများကို လေ့လာနိုင်မှာဖြစ်ပါတယ်။ ပထမဆုံးလွှတ်တော်အဆောက်အဦနေရာအနီးနားတွင် အာဇာနည်ခေါင်းဆောင်များ၏ အထုပ္ပတ္တိကို ရေးသားထားသည့် ကဗ္ဗည်းကျောက်ပြားများလည်း တွေ့ရှိရမှာဖြစ်ပြီး အာဇာနည်များအသက်ဆုံးခဲ့ရသည့် အချိန်များကိုလည်း မှတ်တမ်းရေးသားထားတာကို လေ့လာနိုင်မှာဖြစ်ပါတယ်။
ယခုအခါမှာ ရန်ကုန်တိုင်းဒေသကြီးအစိုးရအဖွဲ့၊ ရန်ကုန်မြို့ပြအမွေအနှစ်ထိန်းသိမ်းစောက်ရှောက်ရေးအဖွဲ့နှင့် အနော်မာ အနုပညာအဖွဲ့တို့ပူးပေါင်းကာ အာဇာနည်ကြီးများ လုပ်ကြံခံခဲ့ရသည့် အစည်းအဝေးခန်းမကို အာဇာနည်ကြီးများရဲ့ မိသားစုဝင်များ၏ ဆန္ဒ အတိုင်း ၁၉၄၇ ခုနှစ်က အသုံးပြုခဲ့သည့် အနေအထားအတိုင်းပြန်လည်ပြင်ဆင်ထားရှိနိုင်ရေးအတွက် တာဝန်ရှိသူများက ကြိုးပမ်းဆောင်ရွက်လျှက်ရှိ ကြပါတယ်။
ယခုအခါမှာ အနော်မာ အနုပညာအဖွဲ့နှင့်အတူ အမွေအနှစ်ထိန်းသိမ်းဆောက်ရှောက်ရေးအဖွဲ့ဖြစ်တဲ့ Yangon Heritage Trust (YHT) မှလည်း နိုင်ငံရေးအရ၊ သမိုင်းကြောင်းအရ၊ ဗိသုကာလက်ရာအရ ထူးခြားလှတဲ့ အတွင်းဝန်ရုံးကို စနစ်တကျထိမ်းသိမ်းစောင့်ရှောက်ထားပါတယ်။
The Secretariat လို့လည်းခေါ်တွင်တဲ့ အတွင်းဝန်ရုံးကို ပြန်လည်မွမ်းမံမှုများကို လုပ်ကိုင်ခဲ့ပါတယ်။ ကျွန်တော်တို့ရုံးအဖွဲ့ဟာ ရှေးဟောင်းအမွေအနှစ်အဆောက်အဦများကို စိတ်ဝင်စားသူများဖြစ်သည့်အားလျော်စွာ ပြည်သူများကို စတင်ဝင်ရောက်လေ့လာခွင့်ပြုတာကို သိတာနဲ့ ကျွန်တော်တို့ Myanmar Home & Décor မှ သွားရောက်လေ့လာခဲ့ပါတယ်။ ဝန်ကြီးများရုံးအတွင်း လေ့လာရေးခရီးစဉ်ကို လူဦးရေကန့်သတ်ချက်များနဲ့သာ ပေးဝင်ခဲ့ချိန်ဖြစ်လို့ ကျွန်တော်တို့တော်တော်လေး ရင်ခုန်ခဲ့ပါတယ်။ ထိုအချိန်များမှာ လေ့လာရေးခရီးစဉ်ပြုလုပ်ပေးပြီး ဧည့်လမ်းညွှန်တစ်ဦးမှ အသေးစိတ်လိုက်လံရှင်းပြခဲ့တဲ့အတွက် တော်တော်လေး တိတိကျကျသိခဲ့ရပါတယ်။ အတွင်းဝန်ရုံးတစ်ခုလုံးကို ပြန်လည်မွမ်းမံပြင်ဆင်နေချိန်ဖြစ်လို့ ပြင်ဆင်ပြီးတဲ့နေရာများကိုသာ လိုက်လံရှင်းပြပေးခဲ့တာဖြစ်ပြီး တချို့နေရာများဆိုရင် သစ်သားလှေကားကျဉ်းကျဉ်းလေးကနေ တက်သွားရတာမျိုးလည်း ရှိပါတယ်။ လွှတ်တော်ခန်းမထဲမှာဆိုရင် မီဒီယာများသတင်းရယူနိုင်တဲ့နေရာက အစ သေသေချာချာစီစဉ်ထားတာကို သတိထားမိခဲ့ပါတယ်။ အဲဒီအပြင် လေ့လာရေးခရီးစဉ်မှာ ကျွန်တော်အတွက် တန်ဖိုးမဖြတ်နိုင်တဲ့အရာကတော့ ဗိုလ်ချုပ်အောင်ဆန်းနှင့် အာဇာနည်ခေါင်းဆောင်များကို လုပ်ကြံသူဟာ အတွင်းဝန်ရုံးကို ဘယ်လမ်းကြောင်းမှ ဝင်ရောက်လာပြီး ဘယ်လမ်းကြောင်းမှ ပြန်ထွက်သွားတယ်ဆိုတာကို ဧည့်လမ်းညွှန်မှ သေသေချာချာပြောပြတာပဲ ဖြစ်ပါတယ်။ ရဲဘော်ကိုထွေး သေနတ်ဒဏ်ရာမှန်ပြီး လဲကျခဲ့တဲ့နေရာကိုလည်း သိခွင့်ရခဲ့ပါတယ်၊ ဧည့်လမ်းညွှန်ပြောပြတဲ့အချိန်မှာတော့ နားထောင်နေရင်း စိတ်လှုတ်ရှားခဲ့ရပြီး ရင်ထဲဆို့နစ်ကာ မျက်ရည်ဝဲမိခဲ့ပါတယ်။ တော်တော်ကို စနစ်တကျစီစဉ်ပြီး လုပ်ကြံသွားတာဆိုတာကိုလည်း သိနားလည်ခဲ့ရပါတယ်။

နောက်တခုကတော့ အာဇာနည်ခေါင်းဆောင်များကို ဇူလိုင် ၁၉ မှာလုပ်ကြံခဲ့တယ်ဆိုတာကို ငယ်ငယ်တည်းက ကျွန်တော်တို့သိခဲ့တယ်။ အသက်ဆုံးပါးချိန်တွေမတူတာကို ဝန်ကြီးများရုံးကို သွားရောက်လေ့လာချိန်မှပဲ ကျွန်တော်သိခဲ့ရပါတယ်။ ကိုလိုနီခေတ်က တည်ဆောက်ခဲ့သည့် အဆောက်အအုံဖြစ်သည့်အားလျော်စွာ ဗိသုကာလက်ရာများဟာ စနစ်ကျလှတယ်လို့ ဆိုနိုင်ပါတယ်။ အချိုးကွေ့များ၊ လှေကားများရဲ့ ဒီဇိုင်းများဟာ လက်ရာမြောက်လှပါတယ်။ ရုံးခန်းများမှာ သဘာဝအလင်းရောင်ရရှိနိုင်စေဖို့နဲ့ လေဝင်လေထွက်ကောင်းစေဖို့ ပြတင်းပေါက်ကြီးများပါရှိပါတယ်။ မြန်မာ့လွတ်လပ်ရေးဗိသုကာဖြစ်တဲ့ ဗိုလ်ချုပ်အောင်ဆန်းနှင့် အာဇာနည်များ လုပ်ကြံခံခဲ့ရတဲ့ နေရာတစ်ခုဖြစ်သလို မြို့ပြအမွေအနှစ်တစ်ခုလည်း ဖြစ်တဲ့အတွက် နောင်လာနောက်သားတို့အတွက် တန်ဖိုးမဖြတ်နိုင်တဲ့ အဆောက်အအုံကြီးဖြစ်ပါတယ်။ အများပြည်သူများဝင်ရောက်လေ့လာနိုင်တဲ့ နေရာတစ်ခုအဖြစ်ရှိနေပြီး အချိန်ပေးပြီး သွားရောက်လေ့လာသင့်တဲ့နေရာတစ်ခုဖြစ်ပါတယ်။

ယခုဆောင်းပါးကို YHT Page မှ ကိုးကားဖော်ပြပါသည်၊
Photo credit – The Secretariat, Internet, Pinterest

Download eBook version as a FREE!

လူဖတ်အများဆုံး ဆောင်ပါး (၅)ပုဒ်

  • ခေါင်မိုးထပ်က ဥယျာဉ်လေး viewed
  • အလှမွေးငါးကန်ဖြင့် လာဘ်ခေါ်ခြင်း viewed
  • အိမ်ပြောင်းတဲ့အခါ လွယ်ကူစေမယ့်အချက်များ viewed

ဒေါင်းနင်းလမ်းက နာမည်ကျော်အိမ်တစ်လုံး

တည်းဖြတ်သူ Myanmar Home and Decoration
ရေးသားသူ သက်ပိုင်သူ မှ
July 19, 2020 နေ့
ဆောင်းပါးများအခြားဆောင်းပါးများ ကဏ္ဍတွင်
ထည့်သွင်းရေးသားခဲ့သည်။

ads

ကမ္ဘာပေါ်မှာ နာမည်အကြီးဆုံးဖြစ်တဲ့လမ်းတွေအများကြီးထဲမှာ လန်ဒန်မှာရှိတဲ့ ဒေါင်းနင်းလမ်းလည်း အပါအဝင်ဖြစ်ပါတယ်။ ထိုလမ်းလေးသည် နှစ်ပေါင်းသုံးရာကျော်ရှိပြီဖြစ်ပြီး ကမ္ဘာ့ခေါင်းဆောင်တွေ၊ နာမည်ကြီး အနုပညာရှင်တွေ၊ တော်လှန်ရေးခေါင်းဆောင်တွေ ခြေရာထပ်ခဲ့သောနေရာ ဖြစ်ပါသည်။ မြန်မာနိုင်ငံလွတ်လပ်ရေးအတွက် ဗိုလ်ချုပ်အောင်ဆန်းလည်း ဒီဒေါင်းနင်းလမ်းမှာလျှောက်ခဲ့ဖူးပါသည်။ မြန်မာနိုင်ငံ ဒီမိုကရေစီထွန်းကားရေးအတွက် ကြိုးပမ်းနေသောခေါင်းဆောင် လူထုခေါင်းဆောင်လည်း ဒေါ်အောင်ဆန်းစုကြည်လည်း ရောက်ခဲ့ဖူးပါသည်။ ထိုဒေါင်းနင်းလမ်းမှာ မည်သည့်အခါမှ ဆုံခွင့်မရနိုင်တော့သည့် သားအဖနှစ်ဦးရဲ့ခြေရာနှစ်ခုလည်း ထပ်တူကျခဲ့ဖူးပါသည်။


“ကျွန်မအခုပဲ ဒေါင်းနင်းလမ်းက လာခဲ့တာပါ။ ကျွန်မအတွက် သူစိမ်းနေရာတော့ မဟုတ်ပါဘူး။ တီဗွီမှာတင်မကဘဲ ကျွန်မဖခင် ဦးအောင်ဆန်း ၁၉၄၇ ခုနှစ်မှာ လုပ်ကြံသတ်ဖြတ်မခံရခင် ဝန်ကြီးချုပ်အက်တလီနဲ့အတူ လွတ်လပ်ရေးကိစ္စဆွေးနွေးအပြီး ဒေါင်းနင်းလမ်းရှေ့မှာ ရိုက်ကူးထားခဲ့တဲ့ ဓာတ်ပုံဟာ ထင်ရှားပါတယ်။ ဓာတ်ပုံထဲမှာ သူဟာ ဗြိတိသျှစစ်သုံးကုတ်အင်္ကျီရှည်ကို ဝတ်ထားပါတယ်။ သူမကြုံဖူးတဲ့ အအေးဒဏ်ကို ခံနိုင်အောင် ဗြိတိန်အလာလမ်းမှာ အိန္ဒိယခေါင်းဆောင် ဂျဝါဟလာနေရူးကပေးလိုက်တာပါ။ ကျွန်မလည်း အပူပိုင်းနိုင်ငံမှာ ၂၄ နှစ်လုံးလုံးနေခဲ့ပြီးတဲ့နောက် ဒီဘက်အလာမှာ အဲ့လိုကုတ်အင်္ကျီကိုများ လိုမလားလို့တောင် တွေးခဲ့တာမျိုးရှိခဲ့ပါတယ်။ ပြီးခဲ့တဲ့ နာရီပိုင်းကတော့ ကျွန်မအဖေ ဓာတ်ပုံရိုက်သွားတဲ့နေရာမှာပဲ အခုဝန်ကြီးချုပ် ဒေးဗစ်ကင်မရွန်းနဲ့ ဓာတ်ပုံရိုက်နေချိန်မှာတော့ မိုးတွေက ရွာနေပါတယ်။ ဒါဗြိတိန်ရာသီဥတုပါပဲ။”


ဗြိတိန်ပါလီမန်မှာ ဒေါ်စုပြောကြားခဲ့တဲ့ စကားလေးပါ။ ဒေါင်းနင်းလမ်းမှာ သံသယတွေ၊ ညှိနှိုင်းမှုတွေ၊ လွတ်လပ်ရေးတောင်းဆိုမှုတွေ စစ်ကိုမီးမွှေးခဲ့တာတွေရှိသလို စစ်ကိုအဆုံးသတ်တာတွေလည်း ရှိခဲ့ဖူးပါသည်။ ဒီလမ်းလေးက ဝန်ကြီးချုပ်ရဲ့ အိမ်လေးမှာလည်း သေသူသေ၊ နာမည်မသေသူတွေ အများကြီးရှိခဲ့ဘူးပါသည်။ ထိုအိမ်လေးက လူတွေအတွက် ဘာတွေ ခံစားမှုပေးနိုင်သလဲ။ မရောက်ဖူးပေမယ့် သမိုင်းထဲက အိမ်လေးအတွက် တခါတရံတော့ ထိုအိမ်လေးရဲ့ နံရံတွေကို တလွှာချင်းစီ ခွာကြည့်ဖူးခဲ့ချင်ပါသည်။
အဆောက်အဦဆိုတာ ဘာလဲလို့ စဉ်းစားမိတိုင်း ထိုအဆောက်အဦတွေရဲ့ အသက်ရှင်ရင်ခုန်သံတွေကို ကြားမိပါသည်။ လူသားတစ်ဦးမွေးဖွားသလို အဆောက်အဦတစ်ခုကလည်း သူ့အခြေအနေအချိန်အခါမှာ မွေးဖွားလာခဲ့ကြသည်။ သူ့အရိပ်မှာ ခိုလှုံပြီး သူ့အရိပ်ကနေ ဝေးကွာထွက်သွားတဲ့ လူတွေကိုလည်း ငေးကြည့်ချင်ငေးကြည့်နေမိမည်။ ဒါမှမဟုတ် ပြင်းထန်တဲ့ စစ်ရိပ်တွေ ပဋိပက္ခတွေကြားမှာ သူပြိုလဲမည့်အရေးကို စိုးရိမ်ချင်စိုးရိမ်မိပေလိမ့်မည်။ ထိုကဲ့သို့ ခေတ်တွေ၊ စနစ်တွေ၊ လူတွေအမျိုးမျိုးမှာ ဒေါင်းနင်းလမ်းရှိ အိမ်နံပါတ် ၁၀ က ကြံ့ကြံ့ခံရပ်တည်နေဆဲပင်။


ရာစုနှစ်နှစ်ခုကို ဖြတ်ကျော်လာပြီးတဲ့နောက်မှာတော့ အိမ်နံပါတ် ၁၀ က အိုမင်းရင့်ရော်ခြင်းရဲ့ လက္ခဏာတွေကို ပြသလာခဲ့သည်။ အခြေအနေ ယိမ်းယိုင်လာခဲ့တဲ့ ထိုအိမ်ကြီးကို ပြုပြင်ဖို့ ၁၉၅၈ ခုနှစ်မှာ ဗြိတိန်ဝန်ကြီးချုပ် Harold Macmilian က ပြန်လည်ပြုပြင်ထိန်းသိမ်းဖို့ ကြိုးစားခဲ့သည်။ တချို့ကတော့ စရိတ်စက ကြီးမားလွန်းတဲ့အတွက် ပြန်လည်ပြုပြင်ဖို့ထက် အဲ့ဒီအိမ်ကိုဖြိုပြီး အသစ်ပြန်လည်တည်ဆောက်စေချင်ကြသည်။ ဒါပေမယ့် အင်္ဂလန်ရဲ့ သင်္ကေတဖြစ်လာတဲ့ ထိုအိမ်ကို မူရင်းလက်ရာ မပျက်ပြင်ဖို့ ဆုံးဖြတ်ခဲ့ကြသည်။ အိမ်ရဲ့ အတွင်းပိုင်းတွေကို တိတိကျကျ မှတ်တမ်းတိုင်းတာ မှတ်တမ်းတင်ကြသည်။ ဓာတ်ပုံရိုက်ယူကြသည်။ အိမ်အတွင်းပိုင်း လက်ရာတွေကို ဖြိုသင့်တဲ့အရာဖြို၊ ဖြတ်သိမ်းသင့်တာသိမ်း။ နောက်တော့ မှတ်တမ်းယူထားတဲ့အတိုင်း မူလလက်ရာမပျက် ပြန်လည်တပ်ဆင်ခဲ့ကြသည်။ ဥယျာဉ်ကြမ်းခင်းတွေ၊ တံခါးတွေ၊ ပြတင်းပေါက်ဘောင်တွေ၊ ဧည့်ခန်းတွေ၊ ဝန်ကြီးဝန်ခန်းတွေ၊ ဧည့်ကြိုဆောင်တွေ စတာတွေကို မူလပုံရိပ်မပျက် ပြုပြင်ခဲ့ကြသည်။ အိမ်ရဲ့ ဖောင်ဒေးရှင်းကို စတီးနဲ့ ကွန်ကရစ်နဲ့ ကြံ့ကြံ့ခံအောင် အသစ်ထည့်သွင်းခဲ့သည်။ အဆောက်အဦတစ်ခုလုံးမှာ အိမ်ဆောက်ပစ္စည်းအသစ်တွေက အဆောက်အဦတစ်ခုလုံးရဲ့ ၆၀ ရာခိုင်နှုန်း၊ ကျန်တဲ့ ၄၀ ရာခိုင်နှုန်းက မူလလက်ရာတွေနဲ့ တူအောင် ဖန်တီးထားတဲ့ ပစ္စည်းသစ်တွေဖြစ်ခဲ့ကြသည်။


နှစ်ပေါင်းရာချီအောင် ခဏခဏသုတ်လိမ်းခဲ့တဲ့ဆေးတွေကို ပြန်ခွာရတာ ဆေးလွှာပေါင်း လေးဆယ်ကျော်လောက်ရှိခဲ့သည်။ ထိုဆေးတွေ ခွာလိုက်တိုင်းခွာလိုက်တိုင်း ဆေးအောက်မှာ နှစ်ပေါင်းနှစ်ရာကျော် ပုန်းအောင်းနေတဲ့ အဆောက်အဦအနုစိတ်လက်ရာတွေကို ပြန်လည်တွေ့ရှိခဲ့သည်။ နံရံတွေထဲမှာ သိုပိတ်ထားတဲ့ ထိုလက်ရာတွေ ဘာတွေပြောနေကြလဲဆိုတာ သမိုင်းပညာရှင်တို့ ဂရုတစိုက်နားထောင်ခဲ့ကြပါလိမ့်မည်။


နောက်တော့ ပညာရှင်တွေက အိမ်ရဲ့ အတွင်းပိုင်းကိုသာမက အပြင်ပိုင်းကိုလည်း ပြုပြင်ခဲ့ကြပြန်၏။ ထိုအခါ လုံးဝမမျှော်လင့်ထားသည့် ထိုအဆောက်အဦရဲ့အသားက ပေါ်ထွက်ခဲ့ပြန်၏။ ယခုခေတ်တွေ့မြင်နေရသော အိမ်နံပါတ် ၁၀ ရဲ့ အိမ်ရှေ့မျက်နှာစာမှာ အုတ်ရောင်သည် အနက်ရောင်မဟုတ်ခဲ့။ အဝါရောင်ဖြစ်ခဲ့၏။ ဒါပေမယ့် အင်္ဂလန်ရဲ့ စက်မှုမီးခိုးတွေ လေထုညစ်ညမ်းမှုတွေကြားမှာ သူ၏ အသားအရောင်သည် အဝါမှ အနက်သို့ ပြောင်းလဲခဲ့၏။ ယခုခေတ်မှာတော့ အနက်ရောင်ကသာ Icon ဖြစ်နေတဲ့အတွက် အနက်ရောင်ကိုသာ ထိန်းသိမ်းခဲ့သည်။ အိမ်နံပါတ် ၁၀ ကတော့ ငါက အဝါရောင်ဖြစ်တယ် ငါ့ကိုတော့ အဝါရောင်ပြောင်းပေးပါလို့ တောင်းဆိုချင်တောင်းဆိုပေလိမ့်မည်။ ဒါပေမယ့်လူသားတွေကတော့ လူသားဆန်ဆန် ငါသိတာ မင်းကအနက်ရောင်၊ အနက်ရောင်လိုပဲ နေစမ်းပါလို့ ဇွတ်ငြင်းချင်ငြင်းပါလိမ့်မည်။ ဒေါင်းနင်းလမ်းမှာ မိန့်မိန့်ကြီးရပ်တည်နေသည့် အိမ်နံပါတ် ၁၀ ကတော့ အဝါပဲဖြစ်ဖြစ်၊ အနက်ပဲဖြစ်ဖြစ် သူဖြတ်သန်းခဲ့တဲ့သမိုင်းကိုတော့ ဇွတ်အတင်းပြောင်းလဲလို့ မရခဲ့ပေ။


နဂိုမူရင်းက ဒေါင်းနင်းလမ်းမှာ အိမ်သုံးလုံးရှိခဲ့သည်။ အိမ်နံပါတ် ၁၀ ကို ၁၆၈၂-၁၆၈၄ ကြားမှ ဆာဂျော့ဒေါင်းနင်း Sir George Downing ဆိုသူက ဆောက်လုပ်ခဲ့ခြင်းဖြစ်ပါသည်။ ဂျော့ဘုရင် ၂ က ၁၇၃၂ မှာ ဆာရောဘတ်ဝယ်လ်ပိုး Sir Robert Walpole ကိ အိမ်နံပါတ် ၁၀ ကို အပိုင်စားပေးခဲ့ခြင်းဖြစ်ပြီး၊ ဝယ်လ်ပိုးက သူ၏ ပုဂ္ဂလိကပိုင်ဆိုင်မှုထက် ဘဏ္ဍာရေးဝန်ကြီးလက်အောက်မှာ ထားပြီး အသုံးပြုဖို့ စီစဉ်ထားခဲ့ပါသည်။ ဒါပေမယ့် ပါလီမန်နဲ့နီးပေမယ့် အစပိုင်းမှာတော့ ဝန်ကြီးချုပ်အနည်းငယ်သာ နေထိုင်ခဲ့ကြ၏။ အိမ်နံပါတ် ၁၀ က ဝန်ကြီးချုပ်အဆင့်အတန်းနှင့် ညီမျှသည့် ခမ်းနားမှု မရှိသည်ဟုထင်၍ဖြစ်စေ၊ သူတို့ဆီမှာ သည့်ထက်ပိုကောင်းသည့် အိမ်ရှိသည်ဖြစ်စေ နေထိုင်ကြခြင်းမရှိဘဲ ရုံးအဖြစ်သာ သုံးခဲ့ကြသည်။ ဝန်ကြီးချုပ်တွေ နေလိုက်မနေလိုက် စွန့်ခွါလိုက်ပြန်သုံးလိုက်လုပ်နေသော ထို နံပါတ် ၁၀ အိမ်ကိုတော့ ၂၀ ရာစုကစပြီး ဝန်ကြီးချုပ်အဆက်ဆက် အသုံးပြုခဲ့ကြတော့သည်။
ဝန်ကြီးချုပ်ဝန်စတန်ချာချေး Winston Churchill ကတော့ ဒီအိမ်နံပါတ် ၁၀ ကို အတော်လေး သံယောဇဉ်တွယ်သူတစ်ဦးဖြစ်၏။ ဒုတိယကမ္ဘာစစ်ဖြစ်နေသည့်အချိန်တွင် သူ့အတွက်စီစဉ်ထားသော ဗုံးခိုကျင်းထဲက အိပ်ခန်းတွင် သိပ်ပြီးနေထိုင်ခြင်းမပြုဘဲ ဒီနံပါတ် ၁၀ အိမ်မှာပင် ဝင်လိုက်ထွက်လိုက်ဖြင့် နိုင်ငံကို အုပ်ချုပ်ခဲ့သည်။


၂၀ ရာစုမှာတော့ ဝန်ကြီးချုပ်နေအိမ်အဖြစ် တရားဝင်လူသိလက်ခံနေပြီဖြစ်သော အိမ်နံပါတ် ၁၀ မှာ ဓာတ်ပုံများ၊ သတင်းစာများ၊ တီဗွီဖန်သားပြင်များပါ ခဏခဏနေရာယူလာခဲ့သည်။ ဝန်ကြီးချုပ်က အရေးတကြီးဧည့်သည်များကို အိမ်နံပါတ် ၁၀ တံခါးမကြီးမှ ထွက်ကြိုသည့် ပုံရိပ်တွေက အဓိကကျသည့် ခန်းမမှ ပါဝင်လာခဲ့သည်။ နောက်ပြီး တံခါးမကြီးရှေ့မှာရပ်ပြီး ဝန်ကြီးချုပ်နှင့် ဧည့်သည်တော်များ ဓာတ်ပုံရိုက်ယူခြင်းက အစဉ်အလာတစ်ရပ်လို ဖြစ်လာသည်။ အိန္ဒိယနိုင်ငံလွပ်လပ်ရေးအတွက် လာရောက်ဆွေးနွေးသည့်အချိန်မှာ ထိုအိမ်ရှေ့ရပ်ပြီး ရိုက်ထားသည့် မဟဒ္ဒမဂန္ဒီ၏ ဓာတ်ပုံကလည်း အိန္ဒိယနိုင်ငံ လွတ်လပ်ရေးပြယုဂ်အတွက် ထင်ရှားလှသည်။ မြန်မာနိုင်ငံလွတ်လပ်ရေးအတွက် အောင်ဆန်းအက်တလီစာချုပ်ကို ချုပ်ဆိုဖို့ရောက်လာသည့် ဗိုလ်ချုပ်အောင်ဆန်းလည်း ထိုဒေါင်းနင်းလမ်းမှာ ရိုက်ထားသည့် ဓာတ်ပုံကလည်း မြန်မာ့သမိုင်းမှာ အရေးပါခဲ့သည်။


ထိုမျှသာမက ဗြိတိန်အစိုးရကို ဆန္ဒပြသည့် နေရာသည်လည်း ထိုဒေါင်းနင်းလည်း ဖြစ်ခဲ့သည်။ ဗီယက်နမ်စစ်ပွဲကို ရပ်ဖို့ ၁၉၆၀ ကျော်မှာ ဆန္ဒပြသည့်နေရာသည်လည်း ထိုဒေါင်းနင်းလမ်းဖြစ်ခဲ့သည်။ ပါကစ္စတန်စစ်ပွဲကိုရပ်ဖို့ ဆန္ဒပြသူတွေ စုဝေးသည့် နေရာတစ်ခုလည်း ဖြစ်ခဲ့သည်။ ဗြိတိန်လူမျိုးတွေသာမက ကမ္ဘာလှည့်ခရီးသည်တွေပါမကျန် ဒေါင်းနင်းလမ်းပေါ်မှ အိမ်နံပါတ် ၁၀ တံခါးရှေ့ ပုံစံအမျိုးမျိုးနဲ့ ဓာတ်ပုံရိုက်ယူခဲ့ကြသည်။
ဒေါင်းနင်းလမ်းမှ အိမ်နံပါတ် ၁၀ သည် ဗြိတိန်သမိုင်းသာမက ကမ္ဘာ့နိုင်ငံများ၏သမိုင်းမှာ ထည်ထည်ဝါဝါရပ်တည်နိုင်ခဲ့သည်မှာ ဗြိတိန်အစိုးရကြောင့်လား ခဏခဏစဉ်းစားမိခဲ့၏။ မြန်မာနိုင်ငံရော ထိုလိုအိမ်မျိုးတွေရှိနိုင်သလားလို့ စဉ်းစားမိပြန်၏။ ကိုလိုနီခေတ်က ဆောက်လုပ်ခဲ့သည့် ခမ်းနားလှပသည့် နိုင်ငံတော်သမ္မတအိမ်တော်သာ ဖြိုဖျက်ခြင်းမခံခဲ့ရလျှင် အိမ်နံပါတ် ၁၀ လို နံရံဆေးရေးတွေပြန်ခွာလျှင် ကိုလိုနီခေတ်က အငွေ့အသက်တွေ ပြန်ထွက်လာနိုင်မလား။ ဝန်ကြီးချုပ်ဖြစ်ခဲ့သည့် ဦးနု၏အိမ်၊ ယခုလက်ရှိဒေါ်အောင်ဆန်းစုကြည်နေထိုင်နေသည့်အိမ်၊ ကမ္ဘာ့ငြိမ်းချမ်းရေးဗိသုကာဖြစ်သည့် ဦးသန့်အိမ်၊ ထိုအိမ်တွေကရော သမိုင်းရဲ့ အလှည့်အပြောင်းမှာ အကွက်အပြောက်အဖြစ် ပျောက်ဆုံးနေပြီလား၊ ရှိသေးရဲ့လား၊ ကျန်နိုင်ခဲ့ပါ့မလား။ နံရံကဆေးတွေ ခွာတာနဲ့ ဆက်စပ်တွေးမိရင်း ရာစုနှစ်ပေါင်းများစွာ ထုံးဖြူဖွေးဖွေးဖြင့် လှပစွာ ရပ်တည်ခဲ့သော စစ်ကိုင်းကကောင်းမှုတော် ဘုရားကြီးရော ခေတ်ကိုပြောပြနေသည့် ထုံးအလွှာတွေ တလွှာပြီးတလွှာခွာချခံနေရချိန်မှာ နာကျင်မိသေးလား အမျိုးမျိုးဆက်စပ်ပြီး လွှင့်တွေးမိ၏။


ဗြိတိန်နိုင်ငံရဲ့ ပထမဆုံး အမျိုးသမီး ဝန်ကြီးချုပ် မာဂရပ်သက်ချာကတော့ ဒေါင်းနင်းလမ်းက အိမ်နံပါတ် ၁၀ အိမ်ကတော့ “ ဗြိတိန်နိုင်ငံရဲ့ အဖိုးမဖြတ်နိုင်တဲ့ ရှေးဟောင်းလက်ရာရတနာတစ်ပါး ဖြစ်လာတော့တယ်” ဟု ပြောခဲ့သည်။ ဗြိတိန်သမိုင်းရှိနေသရွေ့ ဒေါင်းနင်းလမ်းက အိမ်နံပါတ် ၁၀ အိမ်လေး ရှိနေဦးမည်ဟု ယုံကြည်မိပါတော့သည်။

Photo Credit – Internet

Download eBook version as a FREE!

လူဖတ်အများဆုံး ဆောင်ပါး (၅)ပုဒ်

  • ခေါင်မိုးထပ်က ဥယျာဉ်လေး viewed
  • အလှမွေးငါးကန်ဖြင့် လာဘ်ခေါ်ခြင်း viewed
  • အိမ်ပြောင်းတဲ့အခါ လွယ်ကူစေမယ့်အချက်များ viewed

ads

မိုးရာသီမှာ ကိုယ်တစ်ဦးတည်းကိုသာ ကျန်းမာနေအောင် ထိန်းသိမ်းဖို့လိုတာ မဟုတ်ပါဘူး။ သင့်အိမ်အတွက်လည်း လိုအပ်ပါတယ်။ မိုးရာသီအတွင်း ရေစိမ့်ထွက်တာတွေ၊ အပြင်ကပြန်လာရင် ရွှံ့တွေပါလာတာတွေ၊ နံရံ စိုထိုင်းထိုင်းဖြစ်နေတာတွေက သက်သောင့်သက်သာမရှိစေတာကြောင့် သတိထားဖို့ လိုပါတယ်။ မိုးရာသီဆိုရင် အိမ်ထဲမှာပဲ အနေများကြတာကြောင့် အိမ်ကို ဘယ်လိုထိန်းသိမ်းကြမလဲဆိုတဲ့ အချက်တွေကို ဖော်ပြသွားမှာပါ။
၁။ အိမ်ခေါင်မိုးနဲ့ မျက်နှာကြက်တွေကို စစ်ဆေးပါ။
မိုးတွင်းမှာ အိမ်အတွင်း ရေစိမ့်တာတွေ မဖြစ်စေဖို့ အိမ်ခေါင်မိုးနဲ့ မျက်နှာကြက်တွေကို သေချာစစ်ဆေးဖို့ လိုပါတယ်။ ခေါင်မိုးပေါက်နေတာ၊ ကြွေပြားတွေကျိုးပဲ့နေတာမျိုးတွေ မဖြစ်စေဖို့ သတိထားပေးဖို့လိုပါတယ်။ ကြွေပြားတစ်ခုနဲ့တစ်ခုအစပ်ကြားမှာ ရေစိမ့်ဝင်မှုနည်းစေတဲ့ သုတ်ဆေးတွေသုတ်ပေးထားရင်လည်း စိတ်ချရပါတယ်။ မိုးရာသီအတွင်း သင့်အိမ်ရဲ့ ခေါင်မိုးမှ ရေယိုနေပြီ၊ ရေစိမ့်နေပြီဆိုရင် ချက်ချင်းပြင်ဖို့ အကြံပေးချင်ပါတယ်။ ဒီအတိုင်းထားထားမယ်ဆိုရင်တော့ ခေါင်မိုးနဲ့ နံရံတွေဟာ အရောင်တွေပြောင်းသွားနိုင်ပြီး မှိုတက်လာနိုင်ပါတယ်။


၂။ အိမ်နံရံ မှိုတက်နေလား၊ စိုထိုင်းနေလား စစ်ဆေးပေးပါ။
အိမ်နံရံတွေဟာလည်း မိုးရာသီမှာ နံရံကဆေးတွေ အလိတ်လိုက်ကွာတာ၊ မှိုတက်တာတို့ ဖြစ်တတ်ပါတယ်။ အဲ့ဒါကဘာကြောင့်လဲဆိုတော့ မိုးရေဟာ နံရံတွင်းမှ စိမ့်ဝင်နေတာကြောင့် ဖြစ်ပါတယ်။
၃။ လျှပ်စစ်နဲ့ လျှပ်စစ် ပစ္စည်းတွေကို စစ်ဆေးပါ။
မိုးရာသီအတွင်း စိုထိုင်းမှုဟာ လျှပ်စစ် ပလက်ခုံတွေ ကွာတတ်၊ ကွဲတတ်ပါတယ်။ ဒါကြောင့်လျှပ်စစ်ကြိုးတွေကို ပလက်ခုံမှာ သေသေချာချာ ရစ်ပတ်ထားလား၊ သပ်သပ်ရပ်ရပ်လုပ်ထားရဲ့လားဆိုတာ သေချာစစ်ဆေးဖို့ လိုပါတယ်။ ပျက်စီးနေတာမျိုးတွေတွေ့ရင်တော့ အမြန်ဆုံးပြင်ဖို့နဲ့ အသစ်အစားထိုးလဲလိုက်တာမျိုးပဲဖြစ်ဖြစ် လုပ်စေချင်ပါတယ်။ အပျက်အဆီးနည်းစေချင်ရင်တော့ လျှပ်စစ်ပစ္စည်းတွေကို စိုထိုင်းတတ်တဲ့ နေရာတွေမှာ မထားသင့်ပါဘူး။ အဲ့လိုလုပ်ပေးတာကလည်း လျှပ်စစ်နဲ့ပတ်သက်ပြီး မီးလောင်တာကို နည်းပါးစေပါတယ်။


၄။ သစ်သားပရိဘောဂတွေကို ဂရုတစိုက်ထိန်းသိမ်းပါ။
ပရိဘောဂပစ္စည်းများ အထူးသဖြင့် သစ်သားနဲ့ပြုလုပ်ထားတဲ့ ပစ္စည်းတွေဟာ ရေနဲ့ထိတွေ့တဲ့အခါ ပျက်စီးလွယ်တာကြောင့် ဂရုတစိုက်ထိန်းသိမ်းပေးဖို့ လိုပါတယ်။ အဲ့လိုပစ္စည်းတွေကို မိုးရေတွေစင်စေနိုင်တဲ့ ပြတင်းပေါက်တို့လို တံခါးတို့လိုနေရာမျိုးမှာ မထားသင့်ပါဘူး။ သင့်အိမ်ဟာ သစ်သားကြမ်းခင်းဖြစ်နေမယ်ဆိုရင် ကြမ်းခင်းကို ခြောက်သွေ့အောင်ထားပါ။ သစ်သားတွေဟာ ရေစိုနေပြီး ဒီလိုအစိုအတိုင်းထားလိုက်တဲ့အခါ ဆွေးပြီး ကျိုးလွယ်တာကြောင့် ခြောက်သွေ့အောင် ထားပေးပါ။


၅။ အိမ်ထဲမဝင်ခင် အရင်သန့်ရှင်းအောင် လုပ်ပါ။
အိမ်ထဲမဝင်ခင် သင့်ရဲ့ ခြေထောက်တွေကို အရင်ဆေးပါ။ ခုနောက်ပိုင်းများသောအားဖြင့် အိမ်ရဲ့ အရှေ့ဘက်မှာ ရေဘုံဘိုင်ခေါင်းထားရှိတတ်ကြပါတယ်။ အကယ်၍ သင့်အိမ်မှာ မရှိဘူးဆိုရင်တော့ အရှေ့မှာ ခြေထောက်သုတ်ပြီး ရေချိုးခန်းထဲမှာလည်း သွားဆေးလို့ရပါတယ်။ အဲ့နည်းလမ်းကလည်း သင့်အိမ်ကို သန့်ရှင်းစေပါတယ်။


၆။ အိမ်တွင်းစီး ဖိနပ်များ အသုံးပြုပါ။
မိုးရာသီမှာ အိမ်တွင်းသန့်ရှင်းစေဖို့ အချက်အလက်တွေကို တခါတလေ မေ့နေတတ်ကြပါတယ်။ အိမ်အတွင်းလှည့်ပတ်သွားလာတဲ့အခါမှာ ကြမ်းပြင်သန့်ရှင်းနေစေဖို့အတွက် အိမ်တွင်းစီးဖိနပ်တွေကို အသုံးပြုပေးပါ။ ရေစုပ်လွယ်၊ သန့်ရှင်းရလွယ်ကူတဲ့ ဖိနပ်မျိုးကို ရွေးချယ်အသုံးပြုပေးစေချင်ပါတယ်။ အပြင်က အညစ်အကြေးတွေဝင်လာနိုင်တာကြောင့် အိမ်တွင်းစီးဖိနပ်တွေကို အပြင်မှာ မစီးပဲ အိမ်ထဲမှာပဲ စီးပေးပါ။


၇။ အစိုဓာတ်ရှိတဲ့ ပစ္စည်းတွေအတွက် ချိတ်ဆွဲဖို့ နေရာစီစဉ်ပါ။
မိုးရာသီမှာ အစိုဓာတ်ရှိတဲ့ ပစ္စည်းတွေကို လက်လွတ်စပယ်ပစ်ထားတာက မကောင်းပါဘူး။ အဲ့ဒီအစား အိမ်ရဲ့ အရှေ့ဘက်မှာ အစိုဓာတ်ရှိတဲ့ ပစ္စည်းတွေကို ထည့်ဖို့။ ထားဖို့ စင်လေးလုပ်ပေးထားလိုက်ပါ။ ကြမ်းခင်းတွေ ညစ်ပတ်မသွားစေဖို့ ထီးနဲ့ မိုးကာအင်္ကျီတွေကို စင်မှာချိတ်ထားနိုင်ပါတယ်။
၈။ ကောဇောအသုံးပြုရင် ဂရုစိုက်ပေးပါ။
မိုးတွင်းမှာ ကောဇောအသုံးပြုပေးတာက သင့်ကို သက်သောင့်သက်သာဖြစ်စေတယ်၊ နွေးထွေးစေပါတယ်။ သို့ပေမယ့် သန့်သန့်ရှင်းရှင်းမထားဘူးဆိုရင်တော့ ပိုးမွှားတွေ၊ အညစ်အပတ်တွေရဲ့ အရင်းအမြစ်တစ်ခုဖြစ်သွားနိုင်တာကြောင့်လည်း အန္တရာယ်ရှိပါတယ်။ မိုးတွင်းမှာ ကောဇောတွေဟာ အစိုပြန်လွယ်ပြီး အနံ့ဆိုး ပိုထွက်တတ်ပါတယ်။ တကယ်ဆိုရင် အိမ်ကြမ်းခင်း သန့်ရှင်းရလွယ်အောင် ကောဇောကို တိုက်ရိုက်ခင်းပြီး အသုံးမပြုတာကောင်းပါတယ်။ ကောဇောကို လှပ်တာတို့ ပြုလုပ်ချင်သေးတယ်ဆိုရင်တော့ သန့်သန့်ရှင်းရှင်းဖြစ်ဖို့ သတိထားဖို့လိုသလို လျှော်တဲ့အခါမှာလည်း အကြမ်းအရမ်းကြီး မလျှော်သင့်ပါဘူး။


၉။ ကြမ်းခင်းသန့်ရှင်းတဲ့အခါမှာ ပိုးသတ်ဆေး အသုံးပြုပေးပါ။
အစိုဓာတ်ရှိတဲ့ အခန်းက ပိုးမွှားတွေပေါက်ဖွားဖို့ အကြိုက်တွေ့တဲ့ နေရာတစ်ခုဖြစ်ပါတယ်။ သင့်ရဲ့ အိမ်ကို ပိုးမွှားတွေ အများကြီးရှိတဲ့ နေရာတစ်ခုအဖြစ် သတ်မှတ်ကြည့်ဖူးပါသလား။ အဲ့ဒါက တကယ်တော့ ရောဂါတွေရဲ့ အရင်းအမြစ်တစ်ခုလည်း ဖြစ်လာနိုင်ပါတယ်။ အဲ့ဒါကြောင့် မိုးတွင်း အိမ်သန့်ရှင်းရေးလုပ်တဲ့အခါ ပိုးသတ်ဆေး အသုံးပြုပေးပါ။ ပိုးမွှားတွေသေစေနိုင်တဲ့ ဓာတုဆေးတစ်မျိုးဖြစ်တာကြောင့် သင့်အိမ်မှာ ပိုးမွှားကြောင့် ဖြစ်တတ်တဲ့ ရောဂါတွေ ကင်းစင်သွားမှာပါ။


၁၀။ လေဝင်လေထွက်ကောင်းအောင် ပြုလုပ်ပေးပါ။
ဒီအချက်ဟာ အရေးကြီးသလောက် လစ်လျူရှုထားခြင်း ခံရတာများပါတယ်။ မိုးတွင်းမှာ သင့်အိမ် လေအဝင်အထွက်ကောင်း၊မကောင်း သတိပြုပေးပါ။ လေအဝင်အထွက်စနစ်ဟာ တံခါးတစ်ချပ်လိုပါပဲ၊ သင့်ရဲ့ အခန်းကို စိုထိုင်းမနေစေဖို့ သန့်ရှင်းလတ်ဆက်တဲ့ လေတွေ ဝင်ထွက်စေဖို့ပဲဖြစ်ပါတယ်။ မိုးပြင်းထန်ရင်တော့ သင့်တံခါးကို ခဏတဖြုတ် ပိတ်ထားနိုင်ပြီး မိုးတိတ်သွားရင်တော့ အထဲကလေတွေ အလဲအလှယ်လုပ်ဖို့အတွက် တံခါးကို ပြန်ဖွင့်ထားပေးပါ။


၁၁။ အပင်တွေကို တိပေးပါ။
နောက်ဆုံးအချက်ကလည်း အရေးကြီးပါတယ်။ မိုးရာသီအတွင်းမှာ သစ်ပင်တွေဟာ ကြီးထွားနှုန်းမြန်ပါတယ်။ အစိမ်းရောင် ကြွယ်ဝတဲ့ အပင်တွေက ခြင်နဲ့ အင်းဆက်ပိုးမွှားတွေအတွက် သဘောကျနှစ်ခြိုက်တဲ့နေရာတစ်ခု ဖြစ်လာတတ်ပါတယ်။ ခြင်အကြိုက်တွေ့စေတဲ့ နေရာမဖြစ်အောင် အပင်တွေကို တိပေးဖို့ လိုပါတယ်။
ဒီလိုဆိုရင် သင့်အိမ်ဟာ ပိုလို့ သက်သောင့်သက်သာရှိစေပြီး လှပမှာ သေချာပါတယ်။ အိမ်ကို ပုံမှန်သန့်ရှင်းပေးဖို့လည်း လိုပါတယ်။ ညစ်ပတ်လာတဲ့အထိအောင် စောင့်မနေပါနဲ့ အမြဲတမ်း သန့်ရှင်းပေးနေပါ။

Photo Credit – Internet

Download eBook version as a FREE!

လူဖတ်အများဆုံး ဆောင်ပါး (၅)ပုဒ်

  • ခေါင်မိုးထပ်က ဥယျာဉ်လေး viewed
  • အလှမွေးငါးကန်ဖြင့် လာဘ်ခေါ်ခြင်း viewed
  • အိမ်ပြောင်းတဲ့အခါ လွယ်ကူစေမယ့်အချက်များ viewed