ဆောင်းပါးများ

ပြည်သူမသိသေးသောအာခီတက်များ

တည်းဖြတ်သူ Myanmar Home and Decoration
ရေးသားသူ ညွှန့်ဝင်းလေး မှ
November 22, 2019 နေ့
ဆောင်းပါးများ ကဏ္ဍတွင်
ထည့်သွင်းရေးသားခဲ့သည်။

ads

အတ္ထုပ္ပတ္တိစာပေရေးသားခြင်း။
၂၃ နှစ်သားအရွယ် ဆရာဒဂုန်တာရာဟာ ၁၉၅၁ မှာသူ့ရဲ့အတ္တရုပ်ပုံလွှာ (သို့မဟုတ်) ကိုယ်တိုင်ရေးပုံတူပန်းချီကားကို “ဒဂုန်တာရာ”
အမည်နဲ့ ရေးဆွဲခဲ့ပါတယ်။ နောက်ရုပ်ပုံလွှာမှာ နိုင်ငံရေးစာပေလောက၊ ဂီတလောက၊ ပန်းချီလောကမှ လူများကိုလေ့လာရေးဖွဲ့ပြန်တယ်။ ၉၇ထုတ် “ဖြတ်ခနဲတွေ့ရသောရုပ်ပုံလွှာကားချပ်များ”မှာတော့ အလွှာစုံ၊ အရောင်စုံ၊ လူစုံ၊ စာပေ၊ ဂီတရုပ်ရှင်၊ ဇာတ်သဘင်၊ ပန်းချီ၊ နိုင်ငံရေး၊ နယ်ပယ်စုံမှ လူများကိုစုတ်ချက်ရေးချယ်ပြန်တယ်။
အတ္ထုပ္ပတ္တိစာပေအဖွဲ့အနွဲ့ပါပဲ။
ဆရာမကြီးလူထုဒေါ်အမာက “ပြည်သူချစ်သောအနုပညာသည်များ”တဲ့။ မထွေးလေး၊ မငွေမြိုင်၊ စိန်ဗေဒါ၊ မြို့မငြိမ်းဇာတ်၊ ရုပ်သေး၊ မငြိမ့်ဆိုင်းနဲ့ ဂီတစာရေးဆရာပေါင်းရှစ်ဦး။ ၉၇ ထုတ် “ မြန်မာခေတ်သစ်ပန်းချီ”ဦးဘဇော်အစ၊ ဦးဘသက်အလယ်၊ ဆရာပေါ်ဦးသက်အဆုံး။ မြန်မာ့မော်ဒန်ပန်းချီကျော်များ။
ခေတ်ရဲ့ မဂ္ဂဇင်းဂျာနယ်စာမျက်နှာပေါ်မှာ “ မော်ဒယ်ဂဲလ်တွေ စန်းထလာသလိုဒီခေတ်ရဲ့ စာရေးဆရာ၊ ပန်းချီဆရာ၊ ဗေဒင်ဆရာ၊ ဆေးဆရာ”ဘာဆရာညာဆရာရုပ်ပုံလွှာအဖွဲ့အနွဲ့တွေ စန်းထလာပါတယ်။
ဆရာချစ်ဦးညို၊ ဆရာကေတီတင့်လွင်ထူး၊ ဆရာမောင်တင်ဆင့်၊ ဆရာမောင်သာချို စတဲ့ ဆရာတွေ ရေးဖွဲ့တာတွေ့ရပါတယ်။ ကျန်တာတွေ ရှိသေးတယ်။
သို့သော် ့ ့ ့ သို့သော်။
အာခီတက် ( architect) ခေါ် ဗိသုကာတို့ရဲ့ ရုပ်ပုံလွှာ။ ဘယ်သူတွေ ရေးဖွဲ့ဖူးပါသလဲ။
ကိုမြင့်ဟန်နဲ့ အင်တာဗျူး၊ ကိုအောင်မြင်နဲ့ အင်တာဗျူး၊ ကိုအောင်မြင့်ထွန်းနဲ့ “ဗျူး”။ ဒေါ်သင်းသင်းအေးနဲ့ “ဗျူး”။ ကျွန်တော်ဖတ်မိသလောက် ဒီလောက်ပါပဲ။ (ဦး)ခင်မောင်ရင်ရဲ့ ရုပ်ပုံလွှာကိုဆရာတင့်လွင်ထူးနဲ့ ဆရာမခင်သူသူဝင်း ရေးဖွဲ့ဖူးတယ်။ ပန်းချီဆရာ့ရုပ်သွင်နဲ့၊ အာခီတက်အနေနဲ့ မဟုတ်။ စာရေးဆရာမမစန္ဒာကိုတီဗီဖန်သားပြင်ပေါ်မှာအမျိုးသားစာပေဆုရတုန်းကတွေ့လိုက်မိပါသေးတယ်။ အာခီတက်ဒေါ်ချိုချိုတင်အနေနဲ့ မဟုတ်။ စာရေးဆရာမစန္ဒာကို “ဗျူး” ခြင်း။
ဆရာမကြီးဒေါ်အမာရဲ့ ပြည်သူချစ်သောအနုပညာသည်များကိုအားကျစွာနဲ့။ ကျွန်တော်က “ပြည်သူမသိသေးသောအာခီတက်များ” လို့ စိတ်ကူးမိရင်းမှ။
ဟိုဘက်ခေတ်(၂၀ ရာစုအစဆိုပါတော့)
ဂရိတ်ဦးဖိုစိန်ကြီးကိုလူတိုင်းသိကြတယ်။ အထူးမိတ်ဖွဲ့ပေးရန်မလို။ ဇာတ်မင်းသားမဟာကြယ်ပွင့်ကြီး။
အဲဒီခေတ်။
ဂရိတ်ဦးသာထွန်း။ ဘယ်သူသိသလဲ။ ဘယ်သူများရုပ်ပုံလွှာကောက်ကြောင်းရေးခြစ်ဖူးပါသလဲ။ (ကျွန်တော့်အထင်ပြောရရင်) ခေတ်ဗိသုကာဘွဲ့ရအာခီတက်တချို့ပင် သိဖူး၊ ကြားဖူးဟန်မတူ။
နှစ်ယောက်စလုံးဟာဂရိတ်တော့ ဂရိတ်ချည်းပါပဲ။
ဂရိတ်ချင်းမတူသောဂရိတ်
ဦးဖိုစိန်ကြီးကဇာတ်ဆရာဂရိတ်
ဦးသာထွန်းကြီးကဗိသုကာဆရာဂရိတ်။
ဆရာမကြီးလူထုဒေါ်အမာစကာလုံးနဲ့ သုံးရင်တော့ “ပြည်သူချစ်သောအနုပညာသည် ဂရိတ်နှင့် ပြည်သူမသိသေးသောအာခီတက် အနုပညာသည် ဂရိတ်။ ဂရိတ်ရွက်ပုန်းသီး။
လူတွေဟာဇာတ်ရုံ၊ ပွဲရုံထဲမှာနေတာမဟုတ်ဖူးနော်။ ဦးဖိုးစိန်ကြီးကို မြင်ဖူးတယ်။ သိဖူးမယ်။ ကြားဖူးမယ်။
လူတွေဟာဘုန်းကြီးကျောင်းမှာဇရပ်မှာနေကြမှာနေကြတာမဟုတ်ဖူးနော်။ အိမ်ထဲမှာနေကြတာ။ ဒီခေတ်တော့ ကွန်ဒိုတွေ အပတ်မင့်တွေမှာနေကြတာ။ အံ့ပါရောဦးသာထွန်းကြီးကိုမသိကြဘူး။ သုံးနဲ့ လေးလိုပဲနီးရက်နဲ့ ဝေးနေလား။ သို့တည်းမဟုတ် ဟင်းအိုးထဲကယောင်းမလိုဟင်းရဲ့အရသာမခံစားတက်တာမျိုးလား။ မတွေးတတ်ပါဘူး။
ကျွန်တော်တို့ဟာ ကျွန်းတော်ကြီးတွေအကြောင်းကိုပြောကြရင် အရှေ့ရိုးမ၊ အလယ်ရိုးမ၊ အနောက်ရိုးမတောင်တန်းကြီးတွေကနေစကားဦးသန်းကြသလို “ အာခီတက်” တွေအကြောင်းပြောကြရင်လည်းဂရိတ်ဦးသာထွန်းကြီးကပင် ခြေဆင်းပျိုးရပါလိမ့်မယ်။
Louis Henry Sullivianကိုမိုးပျံတိုက်ကြီး၏ Father of Sky Scraper လို့ ပြောကြသကဲ့သို့ . . .
Robert Venturiကိုပို့စ်မော်ဒန် ဗိသုကာလက်ရာဟန်နဲ့ ဖခင်ကြီး (Father of Post-Modern Architecture) လို့ ပြောကြသကဲ့သို့ . . .
မြန်မာပြည်ရဲ့ ပထမဆုံး “အာခီတက်” ဂရိတ်ဦးသာထွန်းကိုရောဘယ်လိုဖြေကြမလဲ။ မြန်မာပြည် မော်ဒန်ဗိသုကာရဲ့ ဖခင်ကြီးလို့ ချီးမြှင့်မလား။ ဒါမှမဟုတ်ရှေ့ဆောင် (pioneer) ကြီးလို့ ဂါဝရပြုရမလား။ စဉ်းစားစရာ။
မဟာမြိုင်ဆေးရုံမှာ၊ ဆာကူရာဆေးရုံမှာ၊ ပါရဂူမှာ၊ သျှင်ပါဂူမှာ၊ ကန်သာသာမှာ F.R.C.S တွေ၊ M.R.C.P တွေ၊ ဆေးပညာရပ်ဆိုင်ရာပါရဂူကြီးတွေ၊ သမားတော်ကြီးတွေ လက်ချိုးရေတွက်လို့ မရနိုင်ပါဘူး။ ဦးသာထွန်းအစကိုမြင့်ဟန်တို့အလယ် ၉၈ ဘွဲ့ရ နေမျိုးဝင်းတို့အဆုံး ဗိသုကာနယ်ကျဉ်းကျဉ်းလေးထဲမှာပါရဂူဘွဲ့ မဟာဗိသုကာဘွဲ့ရတွေ ရှိသော်လည်း တော်ဝင်ဗြိတိသျှ ဗိသုကာအသင်းဝင် (F.R.I.B.A) ဖြစ်တဲ့ အာခီတက်အကျော်အမော်တွေဟာဦးသာထွန်းတစ်ယောက်တည်းရှိနေပါသေးတယ်။
၁၈၉၉ ခုနှစ်ဟာဖိုးစိန်မင်းသာစဖြစ်တဲ့နှစ်။ တိုက်တိုက်ဆိုင်ဆိုင်ပဲ ကြည့်မြင်တိုင်သူကြီးဦးမြို့နဲ့ ဒေါ်ယဉ်တို့ကမောင်သာထွန်းကိုမွေးဖွားတဲ့နှစ်၊ မောင်နှမ ခြောက်ယောက်တည်းမှာမောင်သာထွန်းလေးကသားကြီး သြရသ။
အရှင်သီလာနန္ဒာဘိဝံသ (ဆရာဆိုင်ရဲ့သား)ရေးတဲ့ “မြန်မာဗိသုကာပညာရှင်ဆရာဆိုင်” အတ္ထုပ္ပတ္တိစာအုပ်မှာဖတ်ရတာများပန်းချီဆရာကြီး၊ ပန်းပုဆရာကြီး၊ ဗိသုကာဆရာကြီး၊ သာသနာပြု၊ ကျမ်းပြုဆရာကြီး၊ ဂုဏ်ယူဖွယ်၊ အားကျစဖွယ်၊ လေးစားစဖွယ်ပါ။
ဆရာဆိုင်ဟာ မဟာဝိဇယစေတီတော်ကြီးရဲ့ ရိုးရာဗိသုကာပညာရှင်ကြီးဦးငွေလှိုင်ရဲ့ အဖေ၊ ခုခေတ်ပြိုင်အာခီတက် ဦးသာထွန်း၊ ဦးစန်းမောင်၊ ဒေါ်ချိုချိုတင် (မစန္ဒာရဲ့ခင်ပွန်း) တို့ရဲ့ အဘိုးပါ။
ဆရာကြီးဦးသာထွန်းရဲ့ ရုပ်ပုံလွှာဘယ်မှာလဲ။ ဘယ်သူတွေ ရေးဖွဲ့ခဲ့ပါသလဲ။ အာခီတက်ဆိုတော့ သူ့ရဲ့လက်ရာ (works) တွေကရော၊ ဘာတွေကျန်ခဲ့လဲ။
ဆရာ(ဦး)မင်းနိုင်ရဲ့ ပန်းချီဆရာကြီးဦးဘဉာဏ်မှာရေဆေးအကြည် ပန်းချီကားထဲကလိုစုတ်ချက်ခပ်ပါးပါးလေးတစ်ချက်နှစ်ချက်။
၁၉၂၁ သြဂုတ်လ ၂၄ မှာပန်းချီဦးဘဉာဏ်နဲ့အတူအက်စ်အက်စ်အမရပူရဘောၤနဲ့ ဘိလပ်သို့ ဗိသုကာပညာတော်သင် ထွက်ခွါခဲ့ကြောင်း။
၁၉၃၀ ဝန်းကျင်၊ မြန်မာလူမျိုးထဲမှ ပထမဆုံးပန်းချီဥက္ကဌ ဖြစ်ခဲ့ကြောင်း။

ကိုဆန်ဦးနဲ့ ကိုကျော်မင်းတို့ ကျောင်းသားဗိသုကာဘဝက ရေးခဲ့ထုတ်ဝေခဲ့တဲ့ “မြန်မာဗိသုကာလောကတစေ့တစောင်း” လက်ရေးစာဆောင်ငယ်လေးမှာလည်းခပ်ပါးပါးစုတ်ချက်လေးတစ်ချက်နှစ်ချက်။


ဦးသာထွန်း (၁၈၉၉-၁၉၅၄)
F.R.I.B.A.B.SC (Rgn) A Adip (London) A.M.T.P.I AA မှ မထဆဆုံးရွှေတံဆိပ်ဆုချီးမြှင့်ခံခဲ့ရ။ ဆေးတက္ကသိုလ် (၁) ဗိုလ်ချုပ်လမ်း၊ အင်းယားဆောင်၊ သီရိဆောင်၊ ရွှေမောဓောဘုရား ပြင်ဆင်မှုများ၊သွင်ရုပ်ရှင်ရုံနှင့် အခြားနေအိမ်အဆောက်အအုံအများအပြားပုံစံထုတ်ခဲ့။
ဆရာကြီး၏တူမ (အရင်း) ဆရာမဒေါက်တာဒေါ်ယဉ်နွဲ့ကတော့ ဆရာကြီး၏ရုပ်ပုံလွှာကိုရိုးရိုးသားသားပင် ကျွန်တော့ကိုပြောပြခဲ့ဖူးရာ၊
ဆရာကြီးဟာပန်းပွင့်ကလေးတွေရဲ့ သဘာဝကို မြတ်နိုးတတ်ကြောင်း အိမ်မွေးသတ္တဝါငယ်များကို ချစ်တတ်ကြောင်း၊ ပန်းချီကို ဝါသနာကြီးကြောင်း၊ အိမ်မွေးသတ္တဝါငယ်များကို ချစ်တတ်ကြောင်း၊ ပန်းချီကို ဝါသနာကြီးကြောင်း ဒီလောက်သိခွင့်ရပါတယ်။
ဆရာဒေါက်တာမျိုးသန့်တင်ဟာဦးထွန်းညိုမက္ခရာမင်းသားကြီးအစချီပြီးတော့ “ကုန်းဘောင်ခေတ် မြန်မာ့သိပ္ပံပညာရှင်များ” ဆိုတဲ့ ကျမ်းကြီးတစ်စောင်ကို ၁၉၈၄ မှာ ပြုစုခဲ့ပါတယ်။ ဒီစာအုပ်ကြီးကိုဖတ်နေရင်းမှ အဲဒီခေတ် မြန်မာ့ရိုးရာဗိသုကာပညာရှင်ကြီးတွေ အကြောင်းကိုလေ့လာချင်လိုက်တာ။
ကိုဆန်းဦးနဲ့ ကိုကျော်မင်းတို့ရဲ့ မှတ်တမ်းလွှာလေးထဲမှာပဲ ပြည်သူမသိသေးတဲ့ စစ်ကြိုခေတ် အာခီတက်ကြီးခြောက်ဦး။ ဦးသာထွန်း၊ စည်သူဦးတင်၊ ဦးအုန်းကြိုင်၊ ဦးလှသွင်၊ ဦးအုန်းသန်း၊ ဦးမောင်မောင် အာခီတက်အာဇာနည်ခြောက်ဦး။ စစ်ပြီးခေတ်အနောက်မှ ဗိသုကာဘွဲ့၊ မဟာဘွဲ့ရခဲ့သူလေးဦး။ ဦးအောင်မြင့်၊ ဦးခင်မောင်သန်း၊ ဦးကျော်မင်း၊ ဦးဝင်းထိန်၊ ဗိသုကာပညာရပ်ဆိုင်ရာသင်တန်းဒီပလိုမာရခဲ့သူတစ်ဆယ့်နှစ်ဦး။
ပြည်လမ်းမကြီးပေါ်ကလိပ်ခုံးဘီအိုစီကောလိပ်ဟာတစ်ခါကအင်ဂျင်နီယာဗိသုကာကျောင်းကြီးပါ။ လိပ်ခုံးအင်ဂျင်နီယာပင်မြင့်မှ ၁၉၅၈ မှာပထမဆုံးအာခီတက် သဇင်ငါးခက် မွှေးပျံ့လှိုင်ခဲ့ပါတယ်။ ဦးမြင့်သိန်း၊ ဦးထွန်းသန်း၊ ဦးမျိုးမြင့်စိန်၊ ဦးတင်မောင်ရင်၊ ဦးတင်ထွန်းခင်။ ဦးတင်မောင်ရင်ကတော့ ကြွေရက် စောရှာခဲ့လေပြီ။
လွန်ခဲ့တဲ့ အနှစ်နှစ်ဆယ်လောက်က ရှုမဝ၊ မိုးဝေမဂ္ဂဇင်းစာမျက်နှာပေါ်မှာဗိသုကာအနုပညာရပ်ဆိုင်ရာဆောင်းပါးတွေ ရေးဖွဲ့ခဲ့တဲ့ ဆရာဒေါက်တာလွင်အောင်။
ဘာကြာသေးလဲ။ “ပေါ်ဦးသက်အလယ်လာခြင်း” လို့ စကာလုံးနဲ့ ပန်းချီဆွဲတဲ့ဆရာ(ဦး)ခင်မောင်ရင်။
လူတိုင်းလဲတီဗီဖန်သားပြင်ပေါ်မှာသတင်းစာ၊ ဓာတ်ပုံများပေါ်မှာခဏခဏတွေ့ဖူးကြမှာပါ။ ပုဆိုးတိုတိုဝတ်တတ်တဲ့ မဟာနဖူးနဲ့အတူ နှုတ်ခမ်းမွေးဖြူဖြူထားတတ်တဲ့ အာခီတက်ပညာရှင်ကြီးဦးအောင်ကြီးမြင့် (ဒုအင်ဂျင်နီယာချုပ် ဗိသုကာ ဆ-ဆ-က)
စတဲ့စတဲ့ အာခီတက်မြန်မာကျော်တွေအပါအဝင် လိပ်ခုံးကအာခီတက် (၂၈) ယောက်မြောက် ရှင်သန်ခဲ့ပါတယ်။ အချို့လည်းရန်ကုန်မှာတချို့လည်းအရှေ့မှာတချို့လည်းအနောက်မှာ။
အာခီတက်ပဲဗျာ။ ရွှေဘ၊ တင်ညွန့်တို့လိုတွံတေးသိန်းတန် တို့လိုကျေးရွာအရောက် ဘယ်ခရီးပေါက်ပါမလဲ။
အဲဒီဘက်ခေတ်မှာ. . .
Architect Firm လို့ခေါ်တဲ့ ဗိသုကာအုပ်စု၊ အဖွဲ့စုတွေ ရှိခဲ့ပါသေးရဲ့။ ကျော်မင်း၊ ကျော်ရင်၊ ဖေဝင်း။
ဘိုးကြီး၊ တင်ထွန်း၊ အောင်ကြီးမြင့်။ အဲဒီအောင်ကြီးမြင့်ဟာခု ကျွန်တော်တို့ တီဗီဖန်သားပြင်ပေါ်မှာမကြာမကြာတွေ့နေရတဲ့ ဦးအောင်ကြီးမြင့်ပါပဲခင်ဗျား။ ဆရာဘိုဟာBuckminster fuller ရဲ့ dome သီဝရီဒီဇိုင်းတွေကို မြန်မာပြည်နဲ့ မိတ်ဖွဲ့ပေးသူ။ ပုဂံသီရိပစ္စယာဟိုတယ်ရဲ့ အာခီတက်က အဝေးမှာ ဦးတင်ထွန်း။


ရန်ကုန်မြို့တော်ခန်းမကြီးကစည်သူဦးတင်ရဲ့ လက်ရာ။
အဝေးသင်တက္ကသိုလ်က ဦးမျိုးမြင့်စိန်ရဲ့ လက်ရာ၊။
နဝဒေးရုပ်ရှင်ရုံကြီးက ဦးမြင့်သိန်းရဲ့ လက်ရာ။
သဇင်တွေ ညိုးလို့ ကံ့ကော်တွေလည်းကြွေပြီလေ။
ဦးသာထွန်းကပဲတစ်စပြန်စရရင် စစ်ကြိုခေတ်ကအာခီတက်ကြီးတွေ ကြွေရှာပါပြီ။ လိပ်ခုံးခေတ် ဦးတင်မောင်ရင်၊ ဦးကျော်ဇောကြွေခဲ့ပြန်ပြီ။ R.I.T ခေတ် ဦးသောင်းဟန်၊ ဦးဆွေမြင့်၊ ဦးဆန်ညွန့် ဘယ်သူကျန်ဦးမလဲ။ တစ်ဘဝဟာ ရေပွတ်ပမာ၊ ခဏလေးကြွေသွားပြန်ပြီ၊ ကျန်ခဲ့မှာတော့ သူတို့ရဲ့ ဗိသုကာလက်ရာတွေပါပဲ။
ကျွန်တော် ခုရေးဖွဲ့နေတဲ့ ဆောင်းပါးလေးဟာဗိသုကာပညာရပ်ဆိုင်ရာဆောင်းပါးမဟုတ်ပါ။ ဗိသုကာလက်ရာဟန်များကို ဝေဖန်ရေးသားခြင်းလည်း မဟုတ်ပါ။ အိမ်ထဲမှာနေပြီးအာခီတက်တွေနဲ့ ဝေးနေတဲ့သူတွေကို မဂ္ဂဇင်းစာမျက်နှာပေါ်ကတစ်ဆင့် မိတ်ဆက်ပေးခြင်းပါ။ အိမ်ထဲမှာနေတဲ့လူနဲ့ အာခီတက်အကြားပေါင်းကူးတံတားလေးထိုးပေးခြင်းရယ်ပါ။
နှလုံးအထူးကုသမားတော်ကြီးဦးအောင်ချိန်ကိုလူသိပ်မသိကြဘူး။ ကြည်အေး၊ ဂျူး၊ လွန်ထားထား (ဆေးတက္ကသိုလ်)၊ ယဉ်မင်းဦး (ဆေးတက္ကသိုလ်) လူသိများတယ်။ ကဗျာတွေ စာတွေ ရေးကြလို့။
အာခီတက်တွေထဲမှာဆရာဒေါက်တာလွင်အောင်၊ မစန္ဒာ၊ ဆုမိလဲ့ နာမည်ကြီးတယ်။ လူသိများတယ်။ စာရေးကြလို့ပါ။ မိမိရဲ့ ဗိသုကာလက်ရာကြောင့်ဂုဏ်သတင်းမွှေးပျံ့တဲ့ အာခီတက်လည်းရှိပါသေးရဲ့။
ဥပမာ- ဗိုလ်ကြီး (ဦး) ကြူးကျော်။
Domestic Architecture လို့ခေါ်တဲ့ လူနေအိမ် ဗိသုကာလိုင်းမှာဗိုလ်ကြီးကြူးကျော်ဆိုတာဗိသုကာခေတ်တစ်ခေတ် ရှိခဲ့ပါတယ်။ သူ့ရဲ့ ကိုယ်ပိုင်ဗိသုကာလက်ရာဟန်လေးတွေလည်းရှိတယ်။ ၇၀ ခုနှစ်ဝန်းကျင်ဟာ ဦးကြူးကျော်ရဲ့ အိမ်ပုံစံဒီဇိုင်းလေးတွေ တည်ဆောက်လိုက်မှ ခေတ်မီတာ။ ရန်ကုန်၊ မန္တလေး၊ မိုးကုတ်၊ မော်လမြိုင်၊ တောင်ကြီးမြို့ကြီးတွေမှာဦးကြူးကျော်လက်ရာတွေချည်း။
ဦးကြူးကျော်ခေတ်ရဲ့နောက်ပိုင်းလုံးချင်းတိုက်ပုပုကလေးတွေ ဒီဇိုင်းမှာပါစီ(ဦး)မျိုးမြင့်၊ ဦးဝင်းသိဏ်း(နကြီးသိဏ်း)တို့ဟာရန်ကုန်ကျော် အာခီတက်တွေ။
ကနေ့ အရှေ့အနောက် အာခီတက်လောကကို အဝေးကြည့်မှန်ပြောင်းနဲ့လှမ်းကြည့်လိုက်ရင် Ando ရှိတယ်။ Richard Rogerrရှိတယ်။ Frank Gehryရှိတယ်။ အများကြီးပဲရှိသေးတယ်။ ခေတ်ပြိုင် ကမ္ဘာကျော် အာခီတက်တွေ။
၉၀ ခုနှစ် ဝန်းကျင်မှာ မန္တလေးကျော် တစ်ယောက်ရှိဖူးတယ်။ သိကြမှာပါ။ ကိုမြင့်ဟန်၊ သူ့ရဲ့ လက်ရာတွေမှာထူးထူးခြားခြားကိုယ်ပိုင်ဟန်တစ်ခုရှိတယ်။ ဒါ ကိုမြင့်ဟန်ရဲ့ လက်ရာပဲ။ ဒီဇိုင်းပဲလို့ ဆိုင်းဘုတ် ချိတ်ဖို့မလိုဘူး။
မန္တဘေးဈေးချိုသစ်ကြီးကို ကြည့်မလား။ ပြီးတော့ လူနေအိမ် ဒီဇိုင်းတွေ။
ဒီလိုပဲကိုယ်ပိုင်ဟန်တစ်ခုကိုဖန်တီးနိုင်တဲ့ ရှားရှားပါးပါးအာခီတက် အကျော်အမော်တစ်ယောက် ရှိသေးတယ်။


ဆရာရွှေ (အာခီတက် ဦးရွှေ)
ဆရာရွှေဟာကန်ထရိုက်တာလုပ်မစားဘူး။ ဗိသုကာပညာရပ်ကို မြတ်မြတ်နိုးနိုးခင်တွယ်တဲ့ပါရမီရှင်၊ ဖန်တီးရှင် အာခီတက်စစ်တစ်ယောက်ပါ။ “ဗိဿနိုးဂယ်လာရီ” ဟာဆရာရွှေရဲ့ လက်ရာ။ နောက် ဆရာဦးကိုယု၊ ကဗျာဆရာ(ဦး)တင်မိုးတို့ရဲ့ အိမ်လေးတွေ။ ရေစကြိုမှာ၊ မန္တလေးမှာ၊ သြော်. . . “ဖူရိုဆာတို” ဂျပန်စားသောက်ဆိုင်ကလေး။
သမင်လည်ပြန် တွေးကြည့်ရင်။
ဦးသာထွန်းဟာအင်းယား၊ သီရိဆောင်စတဲ့ သူတို့ရဲ့ ဒီဇိုင်းတွေကို “ခဲ” နဲ့ပဲဆွဲမှာ။ ပြီးမှ “မင်” လိုက်ချင်လိုက်ပါ။
ဒီလိုပဲဗိသုကာဆွဲပုံတွေကိုဆွဲခဲ့မှာ။ ဒီတုန်းက ၂၀ ရာစုခေတ်ဦးကိုး။
ခု ၉၈ ခုနှစ်ဘွဲ့ယူတဲ့ နေမျိုးဝင်းတို့ခေတ်။ “ခဲ” တွေ၊ “မင်” တွေ ခေတ်ကုန်သွားပြီ။ Auto Card Archi Cad တွေနဲ့ ဆွဲတဲ့ ကွန်ပျူတာခေတ်၊ ကန်တော်ကြီးS.N.Towerကို နေမျိုးဝင်း ဒီဇိုင်းလုပ်တယ်။ ဦးသာထွန်းတို့ ခေတ်တုန်းကလိုပါစပက်တစ် (Prespective) ကိုခဲတွေ၊ မင်တွေနဲ့ လုပ်မနေတော့ဘူး။ မျက်လှည့်ဆရာများမျက်လှည့်ပြလိုက်သလိုဟောခနဲ၊ ဒိုင်းခနဲ၊ ကွန်ပျူတာနဲ့ဆွဲ printer နဲ့ ထွက်၊ ဆောက်ပြီးသားအဆောက်အအုံကိုဓာတ်ပုံရိုက်ထားသလို၊ ရောင်စုံသုံးဖက်မြင်ပုံထွက်လာတယ်။ အဲဒါ photo realism ပါပဲ ၂၀ ရာစုခေတ်နှောင်း။ ၂၁ ရာစုခေတ်ကြိုရောက်ပြီလေ။

Download eBook version as a FREE!

လူဖတ်အများဆုံး ဆောင်ပါး (၅)ပုဒ်

  • Home page 8894 viewed
  • Welcome to Home & Decor 5282 viewed
  • ပြည်တော်အေးရိပ်သာလမ်းမှSingle Family Home 3199 viewed
  • အိမ်နီးချင်းကြောင့် လာဘ်ပိတ်ခြင်း 2795 viewed
  • လမ္းဦးတိုက္မွာ ေနသူေတြ ခ်မ္းသာၾကပါေစ 2703 viewed

ပရိဘောဂများအထားအသိုမှန်ကန်စေဖို့

တည်းဖြတ်သူ Myanmar Home and Decoration
ရေးသားသူ သံသာ မှ
November 20, 2019 နေ့
ဆောင်းပါးများအိမ်တွင်း အလှဆင် နည်းလမ်းများ ကဏ္ဍတွင်
ထည့်သွင်းရေးသားခဲ့သည်။

33
ads

အခန်းလွတ်တစ်ခုဆိုတာကဗလာစာရွက်တစ်ရွက်လို၊ကင်းဗတ်စ်လွတ်တစ်ချပ်လိုပါပဲ။လှပစည်ဝေအောင်လွတ်လပ်စွာပြင်ဆင်နိုင်မယ့်အခွင့်အရေးလည်းဖြစ်နိုင်သလို၊စိန်ခေါ်မှုတစ်ခုလည်းဖြစ်စေနိုင်ပါတယ်။လွတ်နေတဲ့ဗလာအခန်းထဲမှာဘာတွေနဲ့ဖြည့်စွက်အလှဆင်မလဲ၊မှန်ကန်တဲ့ပရိဘောဂကိုအထားအသိုဘယ်လိုမှန်အောင်ထားမလဲ၊ဘယ်ကစလုပ်ရင်ကောင်းမလဲ။ဒီမေးခွန်းတွေအတွက်နည်းလမ်းတွေအများကြီးရှိနိုင်ပါတယ်။

ပရိဘောဂတွေကိုနေရာချဖို့ရာအတွက်အခြေခံနည်းလမ်းတစ်ချို့ကိုလေ့လာစုစည်းထားခဲ့ပြီးဒီထဲကမှနည်းလမ်း (၁၀)ချက်ကိုထုတ်နုတ်တင်ပြလိုပါတယ်။ဒီနည်းလမ်း (၁၀)ချက်ကပရိဘောဂပစ္စည်းတွေကိုဘယ်မှာထားရမလဲ။ဘယ်မှာမထားရဘူးလဲ။ဘာကိုဦးစားပေးရွေးချယ်မလဲဆိုတာတွေမှာအကူအညီဖြစ်စေပါလိမ့်မယ်။
ဒီလမ်းညွှန်ချက်တွေကသင့်ကိုညတွင်းချင်းအတွင်းပိုင်းအလှဆင်ဒီဇိုင်နာတစ်ဦးဖြစ်သွားစေမယ့်နည်းလမ်းတွေတော့မဟုတ်ပေမယ့်ကျွမ်းကျင်သူတစ်ဦးရဲ့လက်ရာလိုမျိုးရလဒ်ကောင်းတွေကိုစိတ်ရှုပ်စရာမလိုဘဲလွယ်ကူမြန်ဆန်စွာနဲ့ ပြင်ဆင်ရရှိနိုင်စေမှာဖြစ်ပါတယ်။

Myanmar Home & Decor






အသုံးပြုမှု
အခန်းကဘယ်လိုမျိုးပုံစံသုံးချင်တာလဲ။လူဘယ်နှစ်ယောက်အသုံးပြုမှာလဲ။ဒီအချက်တွေကအခန်းတစ်ခန်းကိုထားသိုပြင်ဆင်မှုလုပ်ရာမှာထိုင်ခုံနေရာချတာကစပြီးအခန်းထဲပရိဘောဂအမျိုးမျိုးထားရှိဖို့အတွက်စဉ်းစားဆုံးဖြတ်သင့်တဲ့အခြေခံအကျဆုံးအချက်ပဲဖြစ်ပါတယ်။
အဓိကဆွဲဆောင်မှုနေရာ
အခန်းရဲ့အဓိကဆုံချက်လို့ဆိုရမယ့်ဆွဲဆောင်မှုနေရာကိုဘယ်နေရာမှာထားလိုပါသလဲ။မီးလင်းဖိုနေရာ၊ရှုခင်းမြင်ရမယ့်နေရာ၊တီဗွီကြည့်မယ်နေရာဒါမှမဟုတ်ပရိဘောဂနေရာဆိုပြီးနေရာတစ်နေရာကို ရွေးချယ်ဆုံးဖြတ်ရမှာပါ။အခန်းထဲမှာတီဗွီကြည့်ချင်မယ်ဆိုရင် တီဗွီမျက်နှာပြင်ထောင့်ဖြတ်အတိုင်းအတာရဲ့ သုံးဆပမာဏကတီဗွီစင်နဲ့ ထိုင်ကြည့်မယ့် ထိုင်ခုံကြားရှိသင့်တယ်အကွာအဝေးဖြစ်ပါတယ်။ လက်မ ၄၀ တီဗွီဆိုရင် ထိုင်ခုံကတီဗွီစင်နဲ့ ၁၂၀လက်မအကွာလောက်မှာ ရှိသင့်ပါတယ်။

ဦးစားပေးထားသိုခြင်း
အကြီးမားဆုံးဖြစ်မယ့် ပရိဘောဂတွေကိုစတင်နေရာချပါ။ ဧည့်ခန်းမှာဆိုရင် ဆိုဖာဆက်တီခုံတွေ၊ အိပ် ခန်းမှာဆိုရင် ကုတင်ကိုဦးစားပေးနေရာချပေးရမှာဖြစ်ပါတယ်။ များသောအားဖြင့် ဒီပရိဘောဂတွေကအခန်းရဲ့ အဓိကအာရုံစိုက်ရမယ့်နေရာတွေ ဖြစ်လာပါတယ်။ အခန်းရဲ့နံရံဘက်တွေမှာပရိဘောဂတွေအပြည့်အသိပ် ထားတာမျိုးကိုရှောင်ကြဉ်ပါ။ သိပ်ပြီးကျဉ်းတဲ့အခန်းမျိုးကလွဲရင် ထိုင်ခုံတစ်ခုံနဲ့တစ်ခုံကြားစကားပြောလို့ဆိုလို့ အဆင်ပြေမယ့် အကွာအဝေးလေး ချန်ထားပေးပါ။
ခေါက်ချိုးညီမှု
ကျကျနနပြင်ဆင်မှုပုံစံအတွက် ခေါက်ချိုးညီထားသိုမှုပုံစံကအကောင်းဆုံးပါပဲ။ ကျကျနနသေသပ်တဲ့ အပြင်အဆင်မျိုးမလိုချင်ဘဲ သာမန်သက်သောင့်သက်သာရှိတဲ့ရိုးရှင်းတဲ့အခန်းပုံစံမျိုးလေးပြင်ချင်တယ်ဆိုရင် တော့ ခေါက်ချိုးညီထားသိုမှုပုံစံကိုမရွေးသင့်ပါဘူး။

လမ်းကြောင်းချန်ခြင်း
အခန်းထဲမှာသွားလာဖို့လမ်းနေရာလေးချန်ထားဖို့ကိုလည်းစဉ်းစားရမှာဖြစ်ပါတယ်။ တံခါးပေါက်နေရာတွေကလမ်းတွေဖြစ်ပါတယ်။ လမ်းသွားရမယ့်လမ်းကြောင်းနေရာမှာပရိဘောဂကြီးကြီးမားမားတွေနဲ့ လမ်းကြောင်းပိတ်နေမိစေတာမျိုးကိုရှောင်ကြဉ်ပါ။ အသွားအလာများတဲ့ လျှောက်လမ်းမျိုးအတွက် ၇၆စင်တီမီတာ ကနေ၁၂၂စင်တီမီတာကြားနေရာချန်ထားနိုင်ပြီးအခန်းကျဉ်းတွေထဲကလျှောက်လမ်းမျိုးအတွက် ၆၁စင်တီမီ တာခန့်နေရာချန်ထားပေးသင့်ပါတယ်။
အစုအဖွဲ့လိုက်ချထားတဲ့ထိုင်ခုံတွေကြားထဲကနေတိုက်ရိုက်ဖြတ်သွားရတဲ့ လမ်းကြောင်းပုံစံမျိုးမဟုတ် ဘဲထိုင်ခုံတွေဘေးကနေပတ်သွားရတဲ့လမ်းကြောင်းပုံမျိုးထားရှိပါ။ လမ်းကြောင်းကအခန်းရဲ့အလယ်ကနေ ဖြတ်သွားရမယ်ဆိုရင်လည်းထိုင်ခုံနေရာအကျယ်ကြီးတစ်ခုထဲကြားကနေ ဖြတ်သွားရမှာမျိုးထက် လမ်းရဲ့ တစ်ဖက်စီမှာထိုင်ခုံအုပ်စုနှစ်ခုခွဲပြီးနေရာချပေးသင့်ပါတယ်။
အမျိုးမျိုးထားပါ
အခန်းထဲမှာပရိဘောဂတွေကိုအရွယ်အစားစုံလင်အောင် နေရာချပေးတဲ့အခါကျမှ အမြင်အာရုံကိုဆွဲဆောင်မှုရှိစေတဲ့ အပြင်အဆင်မျိုးဖြစ်စေမှာပါ။ အခန်းထဲမှာ မြင့်မားတဲ့ပရိဘောဂပစ္စည်းမျိုးဆို နှစ်ခုကပ် လျက်ထားတာမျိုးထက် ခပ်လှမ်းလှမ်းနေရာချဲထားပြီးမှာထားပေးသင့်ပါတယ်။
ဆန့်ကျင်ဘက်
ဆန့်ကျင်ဘက်နေရာချပုံစံမျိုးဖြစ်စေဖို့ ဖြောင့်တန်းတဲ့ပရိဘောဂမျိုးတွေနားမှာမျဉ်းကွေးပုံပါတဲ့ ပရိဘောဂမျိုးထားပေးပါ။ မျဉ်းဖြောင့်ပုံမော်ဒန်ပရိဘောဂမျိုးဆိုရင် အဝိုင်းပုံစားပွဲလေးနားမှာထားပေးပါ။ မျဉ်းကွေးပုံပရိဘောဂဆိုရင် ထောင့်ချွန်းပါတဲ့ပရိဘောဂမျိုးနဲ့တွဲပြီးသုံးပေးပါ။ ထုထည်ရှိတဲ့ပစ္စည်းမျိုးဆိုရင်လည်းဟင်းလင်းခွင်ပါတဲ့ ပရိဘောဂမျိုးနဲ့တွဲထားပေးပါ။
အသုံးပြုလွယ်ကူစေခြင်း
ထိုင်ခုံနေရာချတဲ့အခါ စားပွဲကိုထိုင်ခုံနေရာတွေအားလုံးကနေလွယ်လင့်တကူအသုံးပြုနိုင်တဲ့အနေအထားနဲ့ နေရာချပေးပါ။ အကွာအဝေးတူပြီး ထိုင်ခုံအားလုံးကနေအသုံးပြုရလွယ်စေပြီးစာဖတ်တဲ့ထိုင်ခုံမျိုးတွေမှာဆိုအနီးအနားမှာမီးဆိုင်းလေးတွေ၊ စားပွဲပေါ်မှာမီးတိုင်ငယ်လေးတွေ ထားနိုင်ပါတယ်။ ကော်ဖီစားပွဲပုလေးတွေကဆိုဖာထိုင်ခုံနဲ့ ၃၆စင်တီမီတာကနေ ၄၆စင်တီမီတာလောက်မှာ ထားပေးပြီးခြေထောက်လှုပ်ရှားမှု အတွက် လွတ်လပ်စေဖို့ နေရာလွတ်ထားပေးတာမျိုးဖြစ်ပါစေ။

လှည့်ပတ်သွားလာခြင်း
ထမင်းစားခန်းမှာ ထမင်းစားဝိုင်းရဲ့နောက်ဘက်မှာ ဖြတ်သွားမယ့်လမ်းနေရာမျိုးသီးသန့်မရှိဘူးဆိုရင် ထမင်းစားစားပွဲနဲ့နံရံရဲ့အကွာအဝေးက အနည်းဆုံး ၁၂၂ စင်တီမီတာကွာဖို့လိုအပ်ပါတယ်။ အခန်းကကျဉ်းတယ်ဆိုရင်တော့ ၉၁ စင်တီမီတာလောက်ခွာပေးမယ်ဆိုရင်လည်းလုံလောက်ပါတယ်။ အိပ်ခန်းမှာဆိုရင် ကုတင်နဲ့ နံရံအကွာအဝေးက ၆၁ စင်တီမီတာလောက် ခွာပေးမယ်ဆိုရင်ရပါတယ်။ ကုတင်နားမှာ ဝင်ပေါက်တံခါး ရှိမယ်ဆိုရင်တော့ ကုတင်နဲ့ တံခါးရဲ့အကွာအဝေးက ၉၂ စင်တီမီတာရှိသင့်ပါတယ်။

ပုံစံနေရာချခြင်း
အခန်းထဲမှာပရိဘောဂတွေအကုန်စုပုံချပြီးမှ နေရာချတာမျိုးထက် ပရိဘောဂတွေကိုဘယ်နေရာမှာဘာကိုထားမယ်ဆိုရင် ပုံကြမ်းရေးပြီးပုံစံနေရာချစီစဉ်ကြည့်တာကပိုပြီးလူသက်သာစေပါတယ်။ အခန်းရဲ့ ထောင့်ဖြတ်အကျယ်ကိုတိုင်းတာပါ။ တံခါးပေါက်၊ ပြတင်းပေါက်နဲ့ မီးပေါက်တွေရှိနေတဲ့ နေရာတွေကိုလည်းသတိပြုပါ။ ပြီးရင် ပရိဘောဂတွေရဲ့အတိုင်းအတာနဲ့ ချင့်ချိန်ပြီးပုံစံစာရွက်အကြမ်းရေးဆွဲပါ။ ကိုယ်တိုင်ပုံဆွဲရတာကိုမလုပ်တတ်ဘူးဆိုရင်လည်းအခန်းဖွဲ့ပညာရှင်တစ်ဦးနဲ့ တိုင်ပင်ကာပုံစံကြမ်းယူလို့လည်းရပါတယ်။ လူသက်သာတဲ့အပြင် စီစဉ်နေရာချရတာလွယ်ကူမြန်ဆန်ချောမွေ့ပြီးပျော်စရာလည်းကောင်းပါတယ်။

Download eBook version as a FREE!

လူဖတ်အများဆုံး ဆောင်ပါး (၅)ပုဒ်

  • Home page 8894 viewed
  • Welcome to Home & Decor 5282 viewed
  • ပြည်တော်အေးရိပ်သာလမ်းမှSingle Family Home 3199 viewed
  • အိမ်နီးချင်းကြောင့် လာဘ်ပိတ်ခြင်း 2795 viewed
  • လမ္းဦးတိုက္မွာ ေနသူေတြ ခ်မ္းသာၾကပါေစ 2703 viewed

ပိုပြီးကျယ်ဝန်းတဲ့ ခြံဝန်းလေးဖြစ်ဖို့ လှည့်ကွက်လေးများ

တည်းဖြတ်သူ Myanmar Home and Decoration
ရေးသားသူ Home & Deco အဖွဲ့သားများ မှ
November 19, 2019 နေ့
ဆောင်းပါးများ ကဏ္ဍတွင်
ထည့်သွင်းရေးသားခဲ့သည်။

132
ads


ပိုင်ဆိုင်ထားတဲ့ ခြံဝန်းလေးက သိပ်ပြီးမကျယ်လှတာကြောင့် ကျဉ်းကျပ်သလိုမျိုးခံစားနေရပါသလား။ ကိုယ့်ခြံဝန်းလေးကို အမြင်နဲ့တင် ကျဉ်းလိုက်တာဆိုပြီးတန်ဖိုးနိမ့်တဲ့ ပိုင်ဆိုင်မှုမျိုးအဖြစ် သတ်မှတ်ခံထားရတာမျိုးကိုမလိုလားဘူးလား။ ရှိရင်းစွဲ အကျယ်အဝန်းထက် ပိုပြီးကျယ်ဝန်းပြန့်ပြူးသွားစေဖို့ အခင်းအကျင်းလေးနည်းနည်းပါးပါးပြောင်းလဲထားသိုလိုက်ရုံနဲ့ ကိုယ့်ခြံဝန်းလေးကို ကိုယ်တိုင်လည်းစိတ်တိုင်းကျ ကျေနပ်နေမယ်၊ ကိုယ့်ခြံဝန်းလေးထဲ အလည်ရောက်လာတဲ့ တခြားသူတွေကလည်းထင်သလောက်မကျဉ်းပဲနဲ့ နေချင်စရာလေးဆိုပြီးအားကျသွားစေရမယ့်ခြံဝန်းအဖြစ် ပြောင်းလဲသွားမှာပါ။ အိမ်အပြင်ဘက်မှာအပန်းဖြေရင်းနားနေနိုင်မယ့်နေရာလေး၊ လိုသမျှပိုပြီး ပြည့်စုံတဲ့ နေရာလေးအဖြစ် ဖန်တီးနိုင်မယ့်၊ ပိုပြီးအဖိုးထိုက်တန်ပြီးပိုပြီးနေချင့်စဖွယ်ကောင်းတဲ့ ခြံဝန်းလေးအဖြစ် ပြောင်းလဲပစ်လိုက်နိုင်မယ့် လွယ်ကူရိုးရှင်းလှတဲ့ လှည့်ကွက်လေးတွေ၊ နည်းလမ်းလေးတွေကိုဆက်ပြီးဖတ်ရှုလေ့လာကြည့်လိုက်ရအောင်၊


၁။ ကောက်ကြောင်းများဖန်တီးပါ။
လှိုင်းတွေလိုမျိုးကွေ့ကောက်နေတဲ့ ကောက်ကြောင်းပုံတွေနဲ့ လျှောက်လမ်းတွေ၊ ပန်းခင်းနေရာတွေကနေရာမကျယ်လှတဲ့ ခြံဝန်းလေးတွေကို ပိုပြီးကျယ်သွားသယောင်ဖြစ်စေမယ့် အမြင်လှည့်စားမှုနဲ့ ပေါင်းစပ်ထားတဲ့ လှည့်ကွက်လေးတစ်ခုပါ။ ဥပမာဆိုရရင်- ပုံမှာဖော်ပြထားတဲ့ ခြံဝန်းလေးရဲ့ အပြင်အဆင်မှာ စက်ဝိုင်းသုံးခုပုံ မျဉ်းကွေးတွေအတိုင်းကျောက်ခင်းလမ်းလေးကိုဖန်တီးထားပြီးပန်းခင်းလေးတွေရဲ့ စက်ဝိုင်းပုံအနားတွေ အဖြစ်လည်းတည်ရှိနေပါတယ်။ ခပ်လှမ်းလှမ်းက မြင်တွေရုံနဲ့ စက်ဝိုင်းပုံမြေအခင်းအကျင်းတွေနဲ့ လှပနေတာကိုခံစားမိကြမှာဖြစ်ပါတယ်။ ဒီအလှအပတွေကို မြင်တွေ့နေချိန်မှာခြံအကျယ်အဝန်းဘယ်လောက်အတိုင်းအတာရှိလဲ ဆိုတာဘယ်သူမှ သတိမမူမိနိုင်တော့ပါဘူး။ ဒီတော့ ဒီလိုအခင်းအကျင်းပုံစံမျိုးနဲ့ ကျဉ်းနေတဲ့ ကိုယ့်ခြံလေးကိုပိုကျယ်သယောင် ဖန်တီးကြည့်ချင်သွားပြီမဟုတ်လား။ ခဏလေးသည်းခံပါဦး။ ထပ်ဖော်ပြမယ့် လှည့်ကွက်တွေကိုဆက်ပြီးဖတ်ရှုကြည့်လိုက်ပါဦး။
၂။ ထောင့်ဖြတ်သွားပါ။
ဥယျာဉ်တန်းလေးတွေကို ခြံဝန်းရဲ့ ထောင့်အနားသတ်တွေမှာလျှောက်လမ်လေးတွေခင်းကာပြောင်းလဲရမှာဖြစ်ပါတယ်။ ခြံဝန်းထဲ ထိုင်ဖို့ထားတဲ့ နေရာထိုင်ခင်းလေးရယ်၊ ပန်းစိုက်ခင်းလေးတွေရယ်ကိုအိမ်မကြီးကနေ ၃၀ ဒီဂရီနဲ့ ၇၀ ဒီဂရီကြားထောင့်နေရာမှာထားရှိပါ။ ထောင့်ဖြတ်ဥယျာဉ်အခင်းအကျင်းက စက်ဝိုင်းပုံမြေအခင်းအကျင်းနဲ့ အလားတူစွာပဲပိုပြီးကျယ်ဝန်း၍ပိုပြီးအဖိုးထိုက်တန်တဲ့ ရင်သပ်ရှုမောဖွယ်ခြံဝန်းလေးဖြစ်စေမှာပါ။
ပုံမှာပြထားတဲ့ ခြံဝန်းလေးမှာဆိုရင်လည်း ဒီဇိုင်းဖန်တီးသူကကျောက်ပြားတွေကိုအိမ်ဆောင်နဲ့ ခြံစည်းရိုးရဲ့ ၆၂ ဒီဂရီထောင့်နေရာမှာခင်းကျင်းပြင်ဆင်ပေးထားတာ ဖြစ်ပါတယ်။


၃။ အသုံးပြုပုံအမျိုးအမျိုးအတွက် မြေကွက်လပ်ကိုပိုင်းခြားပါ။
ကျဉ်းပါတယ်ဆိုတဲ့ ခြံဝန်းလေးထဲမှာ သေးငယ်တဲ့ ခြံပိုင်းလေးတွေအဖြစ် ပိုင်းခြားလိုက်ပြီးအသုံးပြုမယ့် ရည်ရွယ်ချက်အမျိုးမျိုးကို ဖြည့်ဆည်းအသုံးပြုနိုင်ပါတယ်။ အသုံးပြုသွားမယ့် ရည်ရွယ်ချက် တစ်မျိုးစီအတွက် သီးသန့်စီပိုင်းခြားကန့်ပေးရမှာ ဖြစ်ပါတယ်။ ပုံမှာပြထားတဲ့ အနောက်ဖေးဘက် ခုံရှည်ရှည်မျောမျောလေးမှာဆိုရင် ရည်ရွယ်ချက်သုံးမျိုးအတွက် အပိုင်းသုံးပိုင်းကန့်ပေးထားတာကို မြင်ရမှာပါ။ ကြွေပြားခင်းထားတဲ့အပိုင်း၊ မြက်ခင်းပြင်နဲ့ ဥယျာဉ်စိုက်ခင်းအပိုင်း၊ ကလေးကစားကွင်းငယ်အပိုင်းလေးနဲ့အပိုင်းဆိုတဲ့ အပိုင်းသုံးပိုင်းပြုလုပ်ထားတာပါ။ အရိပ်ထဲသန့်သန့်ပြန့်ပြန့်နားနေဖို့ ကြွေပြားခင်းအပိုင်းကိုအသုံးပြုရပါမယ်၊ မြက်ခင်းပြင်လေးမှာလွတ်လွတ်လပ်လပ်နားမယ်၊ အပင်လေးတွေ တယုတယစိုက်ပျိုးဖို့အတွက် မြက်ခင်းနဲ့ စိုက်ခင်းအပိုင်းကိုအသုံးပြုမယ်၊ သားသားမီးမီးတွေ ဘေးအန္တရာယ်ကင်းကင်းနဲ့ ဆော့ကစားနိုင်မယ့် ကစားကွင်းခြံပိုင်းလေးလည်းမပါမဖြစ် တည့်သွင်းဖန်တီးထားတာဖြစ်ပါတယ်။
၄။ ဦးစားပေးနေရာလေးအဖြစ် သန့်ရှင်းအောင်ထားပါ။
ကျဉ်းလွန်းပါတယ်ဆိုတဲ့ ခြံအနေအထားမျိုးမှာအဆင့်အတန်းမြင့်တဲ့ အသွင်ပုံမျိုးလေး ဖြစ်ချင်သူတွေအတွက် ကိုယ်အသုံးပြုလိုတဲ့ ခြံနေရာပိုင်းလေးမှာပစ္စည်းတွေ ပြည့်ကျပ်ညပ်နေအောင် အများကြီးထည့်ပြီး ပြင်ဆင်ထားတာအမျိုး၊ မလိုအပ်တဲ့ ပစ္စည်းတွေ စုပုံထိုးထည့်ထားတာမျိုးမလုပ်ဘဲကိုယ့်ရဲ့အကြိုက်ဆုံးနေရာလေးလိုမျိုးဦးစားပေးပြီးရှင်းရှင်းသန့်သန့်လေးဖြစ်အောင် ဖန်တီးပေးထားသင့်ပါတယ်။ ပုံမှာပြထားတဲ့ အပြင်အဆင်လေးမှာဆိုရင် ခြံပိုင်ရှင်ကသူ့ရဲ့ကျဉ်းမြောင်းလှတဲ့ ခြံပိုင်းလေးကိုမကွယ်သွားအောင် လေဝင်လေထွက်ကောင်းစေမယ့် အမိုးလေးတစ်ခုထိုးပေးထားပြီးအပင်အိုးလေးတွေ ခြံကွက်လပ်ဘေးပတ်လည်ကိုဘောင်ခတ်သလိုပြင်ဆင်စိုက်ပျိုးထားပါတယ်။ တောက်ပပြီး ဆွဲဆောင်မှုရှိစေမယ့် သတ္တုရောင်ပန်းအိုးလေးတွေနဲ့လည်းရှင်းရှင်းသန့်သန့်လေး ပြင်ဆင်စိုက်ပျိုးထားတာကို မြင်နိုင်မှာ ဖြစ်ပါတယ်။
၅။ စင်္ကြ ံလျှောက်လမ်းပုံခေါက်ရိုးကျိုးမှုကိုရှောင်ကြဉ်ကာပန်းဥယျာဉ်အလွှာများဖန်တီးပါ။


ခြံဝင်းမြေလွတ်နေရာကို ပန်းဥယျာဉ်ဖန်တီးတဲ့အခါ သမားရိုးကျဖြောင့်တန်းနေတဲ့ စင်္ကြ ံလျှောက်လမ်းပုံတွေကအလွန်ရိုးအီနေတဲ့ ခေါက်ရိုးကျိုးပုံစံမျိုးကိုရှောင်ကြဉ်ပြီးရေလှိုင်းလိုလှိုင်းတွန့်ပုံပန်းခင်းတွေနဲ့ တဆင့်ပြီးတဆင့် အထပ်လိုက်မြင့်တက်သွားတဲ့ ပန်းခင်းအလွှာတွေနဲ့ ဖန်တီးပေးကြည့်ပါ။ ဘယ်လိုကြည့်ကြည့် ဆွဲဆောင်မှုရှိနေတဲ့ ပန်းခင်းပုံသဏ္ဍာန်တွေက ခြံဝန်းရဲ့ ရှိရင်းစွဲအတိုင်းအတာကိုမေ့သွားလောက်အောင် မင်သက်သွားစေမှာအသေအချာပါပဲ။
၆။ အပင်စိုက်ပျိုးနိုင်မယ့်နေရာများများပေးထားပါ။
မြေနေရာကိုပဲကျဉ်းမသွားစေဘဲအပင်တွေစိုက်ပျိုးနိုင်မယ့် နေရာများအောင်တွက်ချက်စဉ်းစားကြည့်ပါ။ ပုံမှာပြထားတဲ့ ခြံအပြင်အဆင်လေးမှာဆိုရင် ခြံနေရာများများစားစားမရှိလှပေမယ့် အပင်တွေကိုအများကြီးရအောင်စိုက်ပျိုးပြထားတာကိုတွေ့မြင်နိုင်ပါတယ်။ ခြံရဲ့ဝင်ပေါက်လျှောက်လမ်းကိုမထိခိုက်စေဘဲလေးတစ်ဖက်တစ်ချက်စီမှာအပင်တန်းငယ်စိုက်ပျိုးထားနိုင်မယ့် ဘောင်ခတ်မြေနေရာလေးရယ်၊ ဘေးဘက်ခြံစည်းရိုးတစ်ဖက်တစ်ချက်စီမှာစင်လေးတွေကနေတစ်ဆင့် တွယ်တက်အပင်လေးတွေနဲ့ ဝေဆာလှပအောင် စိုက်ပျိုးအလှဆင်ထားပါတယ်။ လက်ဆန့်တန်းလိုက်ရင် နှစ်ပြန်စာလောက်သာသာပဲရှိတဲ့ ဒီအိမ်ခန်းနဲ့ ခြံဝန်းအနေအထားလေးမှာဆိုရင် ပြင်ဆင်ဖန်တီးမှု စိတ်ကူးမကောင်းဘူးဆိုရင် အတော်လေးကျဉ်းပြီးနေရထိုင်ရတာလည်းအလွန်ကျပ်တောက်ကာမလူးသာမလွန့်သာနဲ့ အတော်လေးစိတ်ကျဉ်းကျပ်မယ့် အနေအထားပဲ ဖြစ်ပါတယ်။ ဒါပေမယ့် ဧည့်ခန်းလေးရဲ့ ခေါင်မိုးမှာအလင်းရောင် ဝင်စေမယ့် လသာမှန်ပေါက်ရယ်၊ အိမ်ရဲ့ရှိသလောက်အကျယ်အတိုင်းဖောက်ထားတဲ့ တံခါးမအကျယ်ကြီးရယ်၊ ခြံဝန်းထဲကို လှမ်းပြီးမြင်နေရကာအိမ်ခန်းနဲ့ ခြံဝန်းမြေတစ်ဆက်တည်းဖြစ်နေသလို ဖန်တီးထားမှုတွေကအိမ်လေးကိုရှိရင်းစွဲထက် ပိုပြီးကျယ်ဝန်းသေသပ်သန့်ရှင်းတာကြောင့် နေချင့်စဖွယ်အိမ်လေးအဖြစ် သက်သောင့်သက်သာရှိရှိနေထိုင်နိုင်မယ့်အိမ်လေး ဖြစ်သွားခဲ့တာပါ။
၇။ နွေးထွေး၍သက်သောင့်သက်သာရှိသည့် အိမ်ပြင်ဘက်အခန်းလေးဖန်တီးပါ။
ခြံဝန်းခပ်ကျဉ်းကျဉ်းလေးမို့ တသီးတသန့်ကြီးဖန်တီးထားတာမျိုးမလုပ်နိုင်ဘူးဆိုရင်လည်းကိုယ်တိုင်အေးဆေးသက်သာနားနေလို့ရမယ့် အိမ်ပြင်ဘက် အိမ်ခန်းမျိုးလေး ပြင်ဆင်ကြည့်နိုင်ပါတယ်။ ပုံမှာဆိုရင် ကျဉ်းမြောင်းတဲ့ ခြံလွတ်နေရာလေးမှာပဲအိုးလေးတွေနဲ့ အပင်လေးတွေ ရသလောက်စိုက်ပျိုးထားတာ ၊ ခြံအနားသတ်လေးတွေမှာမြေတန်းငယ်လေးချန်လှပ်ထားပြီးအပင်လေးတွေစိုက်ပျိုးထားတာအပြင် ရှည်ရှည်မျောမျောသစ်သားစားပွဲလေးနဲ့ ခုံတန်းရှည်လေးကိုလည်းအိမ်ရဲ့ ဘေးနံရံနဲ့ ကပ်ထားတာကိုလည်းတွေ့မြင်နိုင်မှာပါ။ တခြားလူတွေလာအနှောက်အယှက်မပေးနိုင်တဲ့ စာအုပ်လေးဖတ်ရင်းအနားယူနိုင်မယ့် နေရာလေးဖြစ်ပါတယ်။ မီးလုံးလေးတွေ တန်းပြီးချိတ်ဆွဲထားတာကြောင့် ညဘက်မီးထွန်းလိုက်တဲ့ အခါမှာလည်းလှပနေမယ့် နေရာလေးတစ်ခုဖြစ်သွားစေမှာပါ။
၈။ ဥယျာဉ်ခြံရဲ့အတိုင်းအတာကိုခန့်မှန်းလို့အောင် ဖုံးကာပါ။
မျက်စိနဲ့ မမြင်တွေ့ရတဲ့အခါ နောက်ကွယ်ကအတိုင်းအတာကိုစိတ်ကူးရှိသလိုမှန်းဆနိုင်ပြီးရှိရင်းစွဲထက် ပိုကျယ်သွားစေနိုင်ပါတယ်။ ခြံတံတိုင်းတွေကိုမျက်စိနဲ့ မမြင်အောင် သစ်ပင်တွေ၊ ခြံပင်ပုတွေနဲ့ ဖုံးကာပြီးစိုက်ထားလိုက်ပါ။ အပင်တွေရဲ့နောက်မှာ ခြံအကျယ်ကြီးထပ်ရှိနေသေးသလိုမျိုးစိတ်ကူးနဲ့ ပုံဖော်စေမှာ ဖြစ်ပါတယ်။ အပင်တွေရဲ့ အနောက်ဘက်မှာ ခြံအတွက်လိုအပ်တဲ့ အသုံးအဆောင်ပစ္စည်းတွေ ဝှက်ပြီးသိမ်းဆည်းထားလို့လည်းရပါသေးတယ်။
၉။ ကိုယ့်ခြံအတိုင်းအတာတိုင်းကွက်တိကျတဲ့ ဗီရိုဝှက်ပါတဲ့ ထိုင်ခုံကိုဖန်တီးပါ။
ထိုင်လို့လည်းရ၊ ပစ္စည်းပစ္စယတွေလည်းသိမ်းဆည်းထားလို့ရမယ့် ဗီရိုဝှက်ပါတဲ့ ထိုင်ခုံမျိုးနဲ့ သေချာအံဝင်ခွင်ကျဖြစ်အောင် ဖန်တီးတပ်ဆင်နေရာချထားတာအကောင်းဆုံးပါပဲ။ ပုံမှာဆိုရင် အပင်တွေစိုက်ထားတဲ့ အပင်တန်းနေရာရှေ့မှာနေရာချထားတဲ့ ထိုင်ခုံနေရာလေးအောက်မှာ ဗီရိုဝှက်ပါရှိရင် နေက်ထပ်အလယ်စားပွဲခုံလေးရယ်၊ အရောင်ဆင်တူထိုင်ခုံလေးနှစ်လုံးရယ် ဖြည့်စွက်နေရာချထားတဲ့ အတွက်ကြောင့် ဥယျာဉ်စိုက်ပစ္စည်းအသုံးအဆောင်တွေ စနစ်တကျ သီးသန့်သိမ်းဆည်းဖို့နေရာလေးလည်းရသွားပြီးသေသပ်တဲ့ခြံဝန်းနေရာအပြင်အဆင်လေးဖြစ်ပေမယ့် တစ်ချက်ခုတ်နှစ်ချက်ပြတ် စိတ်ကူးကောင်းလေးပဲ ဖြစ်ပါတယ်။
၁၀။ လှေကားထစ်ဥယျာဉ်စိုက်ခင်းလေးများထည့်သွင်းဖန်တီးပါ။
သေးငယ်ကျဉ်းမြောင်းတဲ့ ခြံဝန်းလေးတွေထဲမှာ လှေကားထစ်ဥယျာဉ်စိုက်ခင်းလေးတွေနဲ့ လှပပြီးအမြင်ဆန်းအောင် ထည့်သွင်းစိုက်ပျိုးဖန်တီးထားနိုင်ပါသေးတယ်။ ဆင်ခြေလျှောပါရှိတဲ့ ခြံနေရာလေးတွေဆိုရင် လှေကားထစ်ပုံဥယျာဉ်စိုက်ခင်းထည့်ဖို့ အကောင်းဆုံးအနေအထားဖြစ်ပါတယ်။ မြေပြင်ညီတဲ့ ခြံဆိုရင်လည်းသစ်သားကြမ်းခင်းစင်မြင့်လေး ခြံဝန်းရဲ့ တစိတ်တပိုင်းမှာထည့်သွင်းဖန်တီးပြီးလှေကားထစ်ဘေးတွေမှာပန်းအိုးရှည်နဲ့ အပင်လေးတွေစိုက်ပြီးလှေကားထစ်ဥယျာဉ်စိုက်ခင်းမျိုး ပြင်ဆင်လို့ရပါတယ်။
၁၁။ အိမ်ပြင်ဘက် မီးရောင်အပြင်အဆင်ထည့်ပါ။
ကျဉ်းမြောင်းတဲ့ ခြံဝန်းတွေထဲမှာ ညနေဘက်မီးရောင်လေးတွေ ထွန်းညှိအလှဆင်ထားတဲ့ အပြင်အဆင်မျိုးလေးကအပြင်အဆင်မျိုးလေးကမျက်စိပသာဒရှိစေပါတယ်။ ခြံထဲစိုက်ထားတဲ့ အပင်လေးတွေကိုမီးထိုးပေးထားတာ၊ နံရံဘက်တွေကိုကပ်ပြီးမီးထိုးအလှဆင်ထားတာ၊ လျှောက်လမ်းဘေးတွေမှာမီးထိုးအလှဆင်ထားတာတွေကအိမ်ပြင်ဘက်ခြံဝန်းကို မီးနဲ့အလှဆင်နည်းအမျိုးမျိုးပဲ ဖြစ်ပါတယ်။ ပုံမှာပြထားတဲ့ အပြင်အဆင်လေးမှာကတော့ ဒီဇိုင်နာခုံအနောက်ဘက် ပန်းပင်လေးတွေကိုမီးထိုးအလှဆင်ပေးထားပြီးထိုင်ခုံရဲ့အောက်ဘက်မှာလည်းမီးထွန်းပေးထားတာကြောင့် ခုံကလေထဲမျောနေသလို ဖြစ်စေတဲ့ အမြင်လှည့်ကွက်လေးနဲ့ ထူးခြားဆန်းသစ်တဲ့ မီးအလှဆင်ဖန်တီးမှု စိတ်ကူးလေးပဲ ဖြစ်ပါတယ်။
၁၂။ အိမ်ပြင်ဘက် မျက်နှာကြက်တပ်ဆင်ပါ။
အိမ်ပြင်ဘက်မှာမျက်နှာကြက်လိုမျိုးဆင်ထားနိုင်မယ့် အထည်စဖျင်ချပ်တွေနဲ့ ကာရံထားနိုင်အောင် ဖန်တီးပြင်ဆင်ထားပါ။ အိမ်ပြင်ဘက်မျက်နှာကြက် ဖန်တီးထားမှုကြောင့် ဥယျာဉ်နဲ့ အဆောက်အအုံကြားဆက်စပ်ကာလိုက်ဖက်စေပါတယ်။ အထည်ဖျင်စတွေနဲ့ မျက်နှာကြက် မပြုလုပ်ချင်သူတွေအတွက် အပင်ပေါင်းမိုးလေးနဲ့ သဘာဝဆန်တဲ့ မျက်နှာကြက်လေးဖန်တီးနိုင်ပါသေးတယ်။ ပုံမှာဆိုရင် ဒီဇိုင်နာက ခြံဝန်းနေရာလွတ်ရဲ့ အပေါ်ဘက်မှာသတ္တုချောင်းတွေနဲ့ ခုံးပုံစံပြုလုပ်ထားပြီးဒီသတ္တုမျက်နှာကြက်အခုံပေါ်ကိုတွယ်တက်ကာအပင်အုပ်လာစေမယ့် နွယ်ပန်းအလှလေးတွေနဲ့ စိုက်ပျိုးကာအပင်ပေါင်းမိုးအဖြစ် ဖန်တီးပေးထားတာ ဖြစ်ပါတယ်။

Download eBook version as a FREE!

လူဖတ်အများဆုံး ဆောင်ပါး (၅)ပုဒ်

  • Home page 8894 viewed
  • Welcome to Home & Decor 5282 viewed
  • ပြည်တော်အေးရိပ်သာလမ်းမှSingle Family Home 3199 viewed
  • အိမ်နီးချင်းကြောင့် လာဘ်ပိတ်ခြင်း 2795 viewed
  • လမ္းဦးတိုက္မွာ ေနသူေတြ ခ်မ္းသာၾကပါေစ 2703 viewed